السلام عليكم
عندي مشكلة سنية صار لها 10 أيام تقريباً
صار عندي حساسية بالضاحك الثاني سفلي
حسب البانوراما الي عملتها
ما ظهر أي مشكلة بالعصب أو الأربطة
كان تشخيص الطبيب حساسية بسبب حشوة الأملغم القديمة
غير الحشوة من الأملغم الى الكومبوزيت
ولكن للأسف الألم استمر و ازداد بالضغط على السن
تحملت أسبوع على أساس هي حشوة جديدة .
راجعت الدكتور وعمل أشعة جديدة وأكد على سلامة العصب ..
وغير الحشوة ..
ومع هيك ما استفدت شي .. الالم مستمر مع ملامسة أي شئ للسن .
هاد غير الشوك سبيكس الي أكلتها
شو رأيكم إخوتي الأفاضل ..؟؟
لاااااقولي حل ^_^
التعليقات
سلامة العصب ما بتتحدد بصورة البانوراما وطالما في ألم معناتها في تحريض من نوع معين بالعصب غالبا الحشوة القديمة كانت قريبة كتير من اللب وصار فيها تسرب حفافي مترقي أدى مع الوقت لالتهاب موضعي وطبعا مع الوقت كانت مرشحة تتحول لاتهاب مزمن أو حاد يؤدي لضرورة سحب العصب المهم ميرة بالعادة بهيك حالات لما منشيل الحشوة ما منحط حشوة جديدة مباشرة لأنو الحشوة الحديدة رح تزيد من الرض خصوصا إذا كانت حشوة ضوئية بسبب الأحماض المستخدمة (تخريش كيمائي) ممكن نطبق ماءات كالسيوم لعزل اللب وتهدئة الوضع ونحط حشوة مؤقتة من النوع الجيد وننطر من اسبوعين لثلاثة عالأقل لحتى يتشكل جسر عاجي
الحل متل ما قلتلك لا بقى تبدلي حشوات لأنو الوضع رح يسوء أكتر , خلي الدكتور يطبقلك ماءات وحشوة مؤقتة ويستنى إذا زال الألم والعصب رمم نفسه ممتاز أما إذا الألم ازداد وحرمك من النوم والأكل فإنت بحاجة لاستئصال عصب
بتمنى كون فدتك ولقيتلك الحل
كلامك جمبل حكيم و شامل لكن بحب ضيف نقطتين بس
الأولى بدي ركز على موضوع الألم باللمس ....... أعتقد أن هذا الألم هو ألم رباطي أو ألم التهاب لب حاد مترافق مع التهاب رباط (هذا يدعونا لمعرفة نوع التحضير)
الثانية هي : الإجراء العلاجي اللي اتبعوا الطبيب بتصور انو الأصح هو اتباع الأسلوب اللي ذكروا حكيم و هو تبطين الحفرة بشكل جيد و إغلاقها بحشوة مؤقتة و ترك السن تحت المراقبة مع إعطاء كورس دوائي حسب حدة الحالة
لكن ما أود التركيز عليه هو انو الطبيب طالما مصر على المعالجة النهائية للسن فالأفضل هو اتباع تقنية منسميها تقنية الساندويتش و اللي فيها بيستخدم مادة الإينومير الزجاجي اللي الو ميزات كتير حلوة بخصوص العزل ... لاسيما انو ذكرتي ميرة انو صار في تبديل بالحشوة و بالتالي بتصور حفرة التحضير صارت كبيرة و عميقة نوعاً
وتسلموا على لهفتكم لحل مشكلتي الي عاملة مشانها استنفاااار هههه
للأسف الحشوة حالياً دائمة .. يعني ما فيني طبق نصيحتك حكيم ..
وما بعرف ليه الدكتور استعجل ما حشاه مؤقتة ؟؟
حتى ماءات الكاليسيوم ما طبقها ؟؟ ولا وصف أي علاج
والحشوة صارت كبيرة مع اعادة الحفر مرتين
ومو معقول احفر مرة تالتة ..والله يمكن جن هههه
شو رأيكم لو استعمل بروفين طالما فيه التهاب أربطة ..ولا شو في غيره انسب ؟؟؟
شغلتكم معي اعذرونييييييييييي
حفر سن بيحتاج تخدير ناحي ..
ومعاناة طويلة عريضة من المخدر ؟؟
لأني حاسة حالي أكلت مقلب فيه هههه
أو لأني أول مرة بجربه ؟
على كل هادا الاجراء الطبيعي بحال وجود الألم وإلا الحفر كان رح يسببلك ألم أكتر من هيك بكتير , منشان البروفين ممتاز لتخفيف الألم بشكل عام أما التهاب الأربطة فمبدئيا مالي كتير مقتنع فيه لأنو اللي بحدده العوامل المسببة أكتر منها طبيعة الألم ورغم ذلك البروفين منيح بكل الأحوال
شكرا علي عالإضافة المميزة فعلا تقنية الساندويش مفيدة بهالحالات وممكن نستجدمها لما المربض بكون مستعجل وبدو حشوة نهائية مباشرة
بس ادعولي الله يستر وما احتاج للعلاج اللبي
و حتى لو زالت الأعراض لازم يبقى السن تحت المراقبة و يجب إجراء اختبارات الحيوية اللبية بشكل دوري حتى لا نفاجأ بتموت اللب و نحن نظن أن الأعراض زالت لاسيما أن الحشوة المطبقة راتنجية و الحفرة عميقة و كما فهمت أن هناك مشكلة بالتبطين
لا أخفيكي ميرة ..... بهيك حالات التموت اللبي و تشكل الخراجات أمر وارد لذلك لازم تخلي السن تحت المراقبة الدورية و لا تتوسوسي فيه كتير و إنما مراجعة للطبيب كل شهرين تكفي لحتى إذا صار تموت باللب يسرع بإستئصال العصب و إجراء المعالجة اللبية
بس صراحة ما فهمت كتير شو هي اختبارات الحيوية اللبية ..
فينا نقول : استجابة السن للقرع ..الحرارة والبرودة ..أو في شي تاني بقدر أعمله أنا ..
بدون زيارة الطبيب ..بيني وبينك ما بحبهااااااااا
أما البروفين ما رح استخدمه أكتر من أسبوع للتسكين وإزالة الالتهاب الرباطي ..برأيكم بيكفي ؟..
ما تشوفي شو ان شالله ..
أما بالنسبة للبروفين فهو للتسكين و يمكن أخذه عند الحاجة و في الواقع نحن لا نحبذ تناوله بشكل كورس لمدة معينة في مثل هذه الحالات
استفدت كتير من موضوعين لحضرتك عن الحيوية اللبية ..
الله يبارك بجهدك ويجعله بميزان حسناتك ..
بس لهلئ الألم موجود ..فينا نقول خف بنسبة 20 % بس
الله يعجل الفرج .. ونشوفكم جميييعاً بخير وسلااامة
عليكي العافية ميرة, و ان شاء الله الوجع لسنان العدا ^_^
بتمنى حاليا تكون انحلت المشكلة و زال الألم !
و اكيد كل الشكر لدكاترتنا الاكارم
المهم وصلت واطمأننا عليك ..الحمد لله على سلااامتك
ان شالله صيامكم مقبول .. والله يعيد هالايام عليكم بخير وسلااامة يا رب
ما في حدا بيحب الروحة عند دكتور الأسنان و لا الابرة ولا الحفر زززززززززز
سرجام أو تيابروفينيك كتير منيح لالتهاب الأربطة السنية و يمكن أخف درجة على المعدة من البروقن