مصطلحات طرطوسية ..؟؟

ميرةميرة المشرفة العامة
تم تعديل 2011/10/07 في نشاطات و ترفيه
مصطلحات طرطوسية ..

عازمك عكاسة متة
: عازمك لعندي.


هالحديث بدو كاسة متة: يعني ما بينقال عالواقف أو عالتلفون, بدو قعدة.

بتتخيلي كاسة المتة هون؟: يعني المنطقة جميلة جدا.

حزور وين شربت متة؟: تدل على غرابة مكان زرته.

حزور مع مين شربت متة؟: قعدت مع واحد ما رح تتوقعو أبدا.

ياما شربان معو متة: كنت صاحبو لهداك الشب (و بتنقال لما الشب التاني بتعلا مراكزو)

سخنو: أنا جاييك عالطريق.

نقاع: يعني تخلى عن رزانتك و شاركنا أطراف الحديث.

لسا ما قطعت كاستك: بتنقال اذا ضيفك بدو يروح و ما طول بالقعدة.

بدنا نجدد: قعدتنا مطولة.

جددنا تلت مرات: يعني الزلمة طول عندي.

قطعت كاستو و ما كنت جددلو: دبقني الأخ و حاولت قحطلو.

ما كنت سخن الأبريق: تعمل عمل سابقتها.

مركزا لحالي: يعني حاطط كاسة متة و قاعد لحالي قعدة رواق.

حزور شو نسينا؟: يعني ما جبنا الأبريق (لما منكون بسيران)

طيبة هلق كاسة المتة: بتنقال بعد أي شي بيعملو الطرطوسي و بالأخص بعد أكلة دسمة, أو لما تشتي الدني.

بدا كاسة متة: الشغلة بدا تركيز.

ما بيشرب متة: مقت.

قاعد و حاطط كاسة متة قدامو: طايلة قعدتو (بتنقال اذا ناطر حدا)

قاعد مأشرب متة: مو ماعمل شي (اذا انسألت شو متعمل)

ما شربتنا متة: ما كانت ضيافتك منيحة (بتنقال عسيبيل المزحة)

ما شربنا متة: ما كانت ضيافتو منيحة (بتنقال بجدية)

شبك؟! بدنا نشرب متة: لا تقلي رايح.

يلا بشرب كاستين: ما رح خجلك, بس عنجد أنا مستعجل.

منشرب متة بالأول ولا مناكل و منشرب متة؟: تنظيم وقت السيران.

انقالت بقعدة متة: ضعيفة المصداقية

الموضوع يمكن يكون مضحك بس كل جملة فيه حقيقية و بتنقال بكل جدية بطرطوس و مو على سبيل المزاح أبدا,
و لا بتثير أي ضحكة بالأوساط.
و هيي بسبب تأثير المتة بحياة الطراطسة
و محوريتا بحياتنا اليومية لدرجة أنو صار في جمل مرتبطة بالمتة
ابقوا شروفنا بكاسة متة

التعليقات

  • صيدولةصيدولة عضو ذهبي
    تم تعديل 2011/03/03
    هههههههههههههههههه .... اي والله هالحكي مزبوط .. اسأليني انا بما انو اكتر من 50% من دفعتنا من طرطوس
  • د عمار عديد عمار عدي عضو نشيط
    تم تعديل 2011/03/03
    واللة ها الموضوع بدو كاسة متة
  • ثليجة البيضاءثليجة البيضاء عضو نشيط
    تم تعديل 2011/03/03
    شكرا على الموضووووووع

    لكن ماهي المتة؟؟؟ لاني احب الاكلات السورية كثيرا
  • د.مفدى زهور عديد.مفدى زهور عدي عضو ذهبي
    تم تعديل 2011/03/03
    موضوع طريف ياريت كل واحد مننا يكتب عن كلمات ولهجة بلده...
  • Ph.SamaPh.Sama مشرفة منتدى تطوير الذات و NLP
    تم تعديل 2011/03/03
    ظريف هالموضوع ميرة... مشكورة كتير
  • Dr.AhmadDr.Ahmad مدير عام
    تم تعديل 2011/03/05
    اي لاااااااااااااااااااااا كل هاد عن المتيييييييييييي ( هي على قولة الحماصنة )

    انا و الله ماني ضريب متة بس وقت الضرورة ماشي حالي بخلص حالي ههه
  • وجيهةوجيهة مشرفة منتدى تربية الأطفال
    تم تعديل 2011/03/05
    هههههه حلو كتير يسلم ايديكي ميرة
  • suzysuzy عضو ذهبي
    تم تعديل 2011/03/06
    شو هالموضوع الحلو ضحكتيني من قلبي

    ثليجة ... المتة هي نوع من الاعشاب تنقع بالماء الساخن وتشرب ... وإلها طقوس وجلسات خاصة

    [3199.imgcache

    شرفينا على سورية لنعزمك على أحلى كاسة متة
  • dr.Alidr.Ali مدير عام
    تم تعديل 2011/03/07
    عم يوجعني راسي ميرة
    طبعاً لا زم اشرب متة

    و كمان لما بيتعبو الطرطوسيين بيقولو فرطت متل المتة( يعني لما بيفرط الضرب)
  • ميرةميرة المشرفة العامة
    تم تعديل 2011/03/07
    بتعرفوا أنا بحياتي ما شربت متة ..
    يمكن لأني بعيدة عن طرطوس ههههه
    مين بدو يعزمني عليها.. ؟؟؟؟

    نورتووووووووووو
  • dr.Alidr.Ali مدير عام
    تم تعديل 2011/03/08
    أهلا و سهلا فيكي ميرة بحماة .......... كل إدارة الموقع بتعزمك على كاسة متة
  • suzysuzy عضو ذهبي
    تم تعديل 2011/03/08
    ليش بتشربو متة كتير بحماه ؟
    و بعد حماه بتكفي على اللادقية ميرة
    أنا ما بشرب متة بالعادة بس معك رح اشربها شو رأيك على الكورنيش قدام البحر:173:
  • Dr.AhmadDr.Ahmad مدير عام
    تم تعديل 2011/03/08
    و الله سوزي لما نكون سهرانين مع الشباب ضمن طقوس خاصة منقرقع متييي اما لحالي و الله ما عندي العدة اللازمة ... بس مفكر جيبها لانو مافي متلها مع الدراسة هههههه

    ميرة .. بانتظارك بالمكتب العلمي للعيادة السورية هههههه اهلا و سهلا سلفاً
  • ميرةميرة المشرفة العامة
    تم تعديل 2011/03/08
    يا عينييييييييييييي ..
    3 دعوات بيوم واحد ..والله طلعت مدعومة ..ههههه
    مشكووورين جميعا على الدعوة الرائعة ..وان شالله يصير لي فرصة ولبيها ..
    سوزي أنا مو من حماة ..
  • دمعة فرحدمعة فرح عضو مميز
    تم تعديل 2011/03/08
    الله والله المتة بتفتح النفس
    بس على هالسيرة شو رأيكن تحكولنا عن فوائد وأضرار المتة ......
  • ميرةميرة المشرفة العامة
    تم تعديل 2011/10/07
    نورتي فرح ..
    إن شالله بنزل لك موضوع حلو عن المتة
    انتظريه بالطب البديل ..

    حياكِ الله