سنفورة وسنفور

بتمنى ما يكون الموضوع انطرح من قبل
لما فتت عالجامعة قالولي انو طلاب السنة الاولى اسمهن سنافر
عجبتني الفكرة
واكيد ما حدا فينا بيقدر ينكر انو تحديدا بالفصل الاول من السنة الاولى بتصير الواحد معه كتير نهفات
واول يوم بحياتنا الجامعية اله نكهة خاصة
عندي وعند رفقاتي متل ما فهمت
انا شخصيا هادا يوم ما بنساه
وبالاحرى اول اسبوعين كانو اغرب اسبوعين بحياتي
قبل ما احكي عن حالي
مشان ما حدا يقول لحالي انه هي نوع من النرجسية
بتمنى كل مين يمرق عالموضوع يحكيلنا
عن اول يوم بحياته الجامعية من الساعة اللي فاق فيها وغسل وشه
لوقت ما حط راسه ونام
وشو النهفات اللي صارت معه خلال الفصل الدراسي الاول؟
أنا عم استنى حدا يبلش
وبعدين انا بحكي عن حالي كيف كنت مصدومة بالدنية حواليي

التعليقات

  • تم تعديل 2009/09/19
    [align=center]أنا من ناحيتي أول يوم كان متل أول يوم بالروضة تبعيتي
    شحطوني أهلي شحط
    لأني ما كنت حابب الكلية إطلاقا
    أول نص ساعة تعرفت ع شب حسيت أنو بيشبه طباعي
    وبدأت المغامرات
    (أنا حاسك أنك كنتي معنا يومها)
    لأن كل بنت أتعرفت كنت عليها ناديلا سنفورة بما أنو كنا صغار
    وما كان حدا يدايق مني
    كنت حس حالي إجتماعي واني بدي أتعرف على كل طلاب الكلية
    مو بس طلاب دفعتي
    ورجعت ع البيت وكانت السعادة تغمرني
    مشكورة ع الموضوع الحلو

    [/align]
  • الرجل البخاخالرجل البخاخ عضو ماسي
    تم تعديل 2009/09/19
    فكرة حلوة كتير ...............
    بالنسبة الي ما كانت الكلية غريبة علي و خاصة انو بمدينتي و كنت مر من جنبها دائماً
    بس الداخل ما عرفتو لأول يوم دوام الفرق كان شاسع
    و الحقيقة قبا ما ادخل عالكلية كان الي أصدقاء من السنة الثالثة ساعدوني كتير و عرفوني على دقاءق الكلية من الأول و بدفعتنا بلشت اتعرف على الناس بالشكل الاعتيادي
    بس نهفةة صارت معي و هي أنو بأول يوم و بتعرفو الواحد جاي من البكالوريا و ما عندو فكرة عن مقررات الكليات و أحجامها لذلك دخلنا على محاضرة علم الخلية و كان الدكتور وقتها د.ابراهيم رجو الله يذكرو بالخير و طلب منا انو نجيب الكتاب فاشتريت الكتاب و تفاجأت لما شفتو 400 صفحة فما أخدت و عطيت بالموضوع و قلت لحالي انو مارح ناخدو كلو أو رح يتقسم على فصلين متل البكالوريا
    بس الصدمة الكبرى بالنسبة لطالب سنة أولى بريء لما بسأل وقتها طالب سنة خامسة عن هالشي فبيضحك علي و بيقلي هاد لفصل واحد بس
    و هون كانت صدمة الي و بلش الهم و الغم لحتى اكتشفت بالآخر انو المسألة بدها بس شوية شغل.............
  • محمد حلبيةمحمد حلبية عضو ماسي
    تم تعديل 2009/09/19
    و الله أول نهار كنت مبسوط و جاية متحمس و ما عاطي فرحتي لحدا هلق صرت شغلة كبيرة ههههه قال يعني صرت دكتورررررررر :18: و بعدها شفنا هديك الشوفات على هالكتب الحلوة و صار كل فصل عندنا بكلوريا ههههههه و يا ريت شي باختصاصي و الحمد الله بعدها تأقلمت مع الوضع لما إجت كما مادة طبية و تعرفت على وجوه جديدة و ناس بأنواع مختلفة .....

    أما أطرف موقف معي ما بتذكر شي محدد و لكن متل كل هالطلاب أول ما بلشت ناديلو للدكتور بالمحاضرة إستاذ .. إستاذ :236:و شوفي هديك النظرة:32: بعينو هههه .....

    شكرا بانادول مشاركة حلوة
  • تم تعديل 2009/09/19
    يالطيف على هديك الايام يالطيف اصعب ايام حياتي فعلا
    متل لي اكل ضربة على راسو وماعرفان وين الله حاطو
    انا اول يوم بالجامعة كان اول يوم برمضان وقتا السنة الاولى كانو مأخرينا المهم ماما اجت لتاخدني عالجامعة وطبعا الجامعة بعيدة عن بيتنا المهم السيارة ما اشتغلت معنا وكانت الحرارة شي 45 بلا مبالغة فوقا صايمين بعد جهد جهيد وصلت عالجامعة وكانو قبل بيوم متصلين فيي وقايلينلي بالمبنى الفلاني بالقاعة الفلانية انا رحت مالقيت حدا كان في محاضرة قانون وانا صيدلة وضعت وصرت ابكي وشغلة بعدين طلعو مغيرين القاعة ونسيانين يقولولي بعد ماكنت بكيانة لشبعانة .
    طولت ماهيك ...
  • تم تعديل 2009/09/19
    شكرا كتير عنجد انبسطت لما شفت شو كاتبين وضحكت كتير
    بس انا مغامراتي كانت غير شكل


    لانو السنفورة انا اجت لتستقر وتدرس بالجامعة بعد ما كانت مقيمة خارج سوريا لمدة اكتر من 10 سنين لذلك كل شي كان غريب
    ومشان تكمل طلع قبولي بغير محافظتي
    وسكنت بمكان ما بعرفه
    وطلعت نتيجتي بعد دوام الطلاب باكتر من شهر
    فقت وطلعت عالشارع وانا ما بعرف مكان الكلية وين وخفت اركب تكسي لانو ماما نبهتني من التكاسي
    لقيت باص اخضر وسالت عمو الشفير اذا بوصلني قام جاوبني بصدر رحب
    طلعت وبقيت واقفة جمبه كاني بودي غارد ولما عطاني كرت ما عرفت كيف بيقطعوه
    المهم لما وصلت متل المسطولة وقفت لحتى قلي انزلي فوتي من باب العلوم
    انبسطت لما لقيت الجامعة فاتحة الصبح بكير ومو نايمين الناس
    وبعدين تعرفت على بنات بجننوني وظراف كتير وساعدوني
    طبعا نفس الفلم صار فيي وقت شفت كتاب التشريح طرف علوي وسفلي فكرته مقسم على الست سنين لوقت التخرج
    بعدين لقيت البنات حافظين نصه
    قلت معناتا للسنة الاولى
    بعدين اكتشفت الحقيقة المرة انه فقط للفصل الاول
    ووقت الرجعة عالبيت ..... سالت البنات و.ركبت بسرفيس لاني ما كنت بعرف الطريق
    وانو كنت اتذكر وين كان البيت وبأنو حارة!
    وما كان الي حدا هونيك اخدة وش عليه يجي يدلني وين سكنت
    لحتى صرت اقرا قران لحتا تذكرت و نزلت بمكان بعيد شوي ورجعت مشي
    وعادت السنفورة المسكينة الى المنزل
    بس طبعا اول اسبوع بنهايته كنت مرضانة وملتهبين لوزي
    يمكن من الزعل على قد ما كنت اكل بهادل بالمخابر من المعيدين لاني ما كنت بعرف شي متل باقي الطلاب اللي داومو من زمان
    كنت على طول مد راسي من شباك المخبر واحبس نفسي لحتى ما ينزلو دموعي قدام حدا
    بس ما بيخلا الامر من بعض الشغلات اللي بتضحك
    طبعا كلمة ندوة كانت بالنسبة الي غريبة
    فكرت معناها محاضرة

    وغير انو لما طالعت البطاقة الجامعية جنيت وقت لقيت كاتبين اسم امي قلت لحالي يا باطل على هالزمن العاطل
    لازم ما يشوفها حدا
    ولي عند الشوام هي شغلة كبيرة انو حدا يعرف اسم امي او اختي
    باعتباري سنفورة قبضاية
    طبعا الحماصنة اكتشفو اني شامية لما كان معيد عم ينادي اسمي مشان يسجلني حضور وانا بعيدة قمت بكل عفوية صرختشحني شحني دكتور
    قام يوميتا استلمني

    لسا في مغامرات كتير بس ما بدي احكي كتير يتبع في الحلقة القادمة
    ما تواخذوني الحكيات طلعو كتار
  • تم تعديل 2009/09/19
    ييييييييييييييييييييييييييييييي نسيت اهم شغلة
    انو اول رحلة بالسرفيس طلعتا ما كنت عرفانة شو القصة باعتبار انو مطرح ما كنت عايشة ما كان في سرافيس
    ناولني واحد 10 ليرات
    قمت ما فهمت عليه انو لازم اعطيها للشوفير
    فكرته عم يعطيني ياه مفكرني ما معي مصاري
    قمت جاوبته بمنتهى البراءة(شكرا عمو انا معايي مصاري)
  • تم تعديل 2009/09/19
    ياسيدي عن شو احكي انا عن اول يوم بالاقامة ولا اول يوم بالجامعة
    رح احك يعن اول يوم بالاقامة نمت بلا عشا هيك وبيكفي ههههههههههه
    اما عن اول يوم بالجامعة كان انا وصديقتي دكتورة تيما هي تدرس معي نفس التخصص بعرفه من شي اربع سنين
    وكتير بحبها عفكرة
    لبسنا الصبح ورحنا للجامعة كانت قريبة من الاقامة دخلنا ولفيناها حتة حتة ماخلينا ولا مكان حتى الادارة هههههههههههههه
    بس مشان نعرف وين المدرج تبعنا
    واخيرا بعد شي ساعة لقيناه دخلنا وقعدنا وبعدين اجا الدكتور وصار يحكي فرنسي ولا حرف عربي ماكن متعودين عليه يعني نفهم كلمة وعشرة لا
    وقعدنا هيك انا وياه نحكي تعرفنا عبعض البنات من ولايات تانية
    بس ايدي ماتركت ايدها الي يشوفنا بيظن انو ادينا ملتصقين هههههه
    وهيك عدت كل السنة
  • Dr.AhmadDr.Ahmad مدير عام
    تم تعديل 2009/09/19
    موضوع حلو كتير دكتورة و خاصة أنو أول أيام الجامعة كانت رهييييبة

    أنا بلشت معي الأفلام من أيام التسجيل قبل حتى ما داوم بعد أخدت أوراق التسجيل و عم عبيها قالولي لازم تروح عالهيئة الادارية مشان شوية أختام و تواقيع متل العادة و أنا سمعت كلمة " هيئة " بجلالة قدرها فكرت شي عشرة خمصطعش واحد قاعدين بكل هيبة و وقار المهم بعد دوارة طويلة عريضة قالولي انو هي الهيئة و كانت الصدمة أكبر ما يمكن لنا عرفت أنو " الهيئة " هي طالب واحد قاعد عم يستقبل الطلاب السنافير
    على فكرة دكتورة انتو هلق بألف نعمة على وقت دخلت الكلية أنا أول سنة دخلت الكلية كانو أول سنة منقولين عالمبنى الجديد يعني ما حدا بيعرف و لا مخبر و صرنا متل

    الجدبان بعيد العنك ( أكيد مريتي بمرحلة الدوخة بين المخابر و الكتل ) ندور على كل مخبر المهم هلق وصلنا لأول يوم ... انا اول يوم طبعا متلي متل كل الطلاب يمكن ما نمت الليلة و الصبح جهزت حالي و أخدت العدة و طلعت ... و على اعتبار اني من حماة يعني لازم طقها سفرة لحمص من وش الصبح و أنا ما بعرف الطريق طالع معي رفيقي قال زميل طريق و هو المسكين متلي ما عرفان حمص طلعت بالميكرو من الكراجات بعد شي عشر دقايق صرت نق على رفيقي طولنا ... لا نكون قطعنا الكلية و مالنا خبر و انا قلبي مقطوع هلق بدنا نمشي و من دون شي أنا فايق بكير و تعبان و الدنيا شوب ربك حميد وصلت بالاخر و كانو الشباب آخدين محاضرة قبل بيوم من الدكتور " ناظم أحمد " على فكرة اذا بدكن تعرفوا هذا الدكتور عن جد اسألي طلاب الخامسة و مافوق و منن انا ......... أنا و بكل فخر قلت هالحكي ما بيصير بدنا نخلي الدكتور يعدلنا المحاضرة كيف بيعيطها و الطلاب ما حاضرين كلن .... و بامكانكم تعرفوا شو صار بعدها ...... طبعا أنا اكيد ما قلتلو للدكتور يعيدها لكن على الصدمة الفكرية اللي تعرضت لها



    ملاحظة دكتورة : سامحينا لأنو كنا نضحك على طلاب السنة الأولى كيف عم يتقاتلوا على باب المدرج مين بدو يدخل .... و أنتي كمان هلق رح تصيري تضحكي معنا على طلاب السنة الأولى على قد مانن متحمسين حتى بباب المدرج بيدخلوا عم يدافشو بعضن
  • تم تعديل 2009/09/20
    انا مرة عملتها بحياتي قلتاجي بكير واقعد ع الصف الاول اي قمت ساعة 6 الصبح 6 وربع كنت عند باب الجامعة لقيت حشد ماشاء الله عنو ظنيت انو عم يستنو الرئيس
    حملت حالي وارجعت عغرفتي كملت النوم وماعدت كررتها
  • تم تعديل 2009/09/20
    لكن كان بدك ناظم احمد يعدلك محاضراته القيمة
    معك حق لازم هوي والدكتورة تمام مروش يعيدو المحاضرات
    اوعك تكون عملت متلي وروحت عليك محاضرات
    طبعا رفقاتي فرطو ضحك عليي لما عرفو انو السنفورة انا بالفصل الاول حذفت مادة الخلية لانو حضرت محاضرة وحدة لقيت البنات قاعدين بالمدرج جايبين مصب قهوة وفناجين وعم يضيفو بعض

    منيح ما تجرأت وقلتله يعدلك
    ههههههه حتى انا الهيئة كنت مفكرتون موظفين كبار
    ووقتا البنات صارو يقولولي بس تروحي عالهيئة خدينا معك
    مضحكة كنت انا
    بعدين وقت شفت عرفت ليش هالبنات مستقتلين على هالفوتة.......عفاريت هالبنات.....وانا القطة المغمضة وفتحولي عيوني ههههه بس رجعت سكرتون


    شكرا عاشقة العلوم على مشاركتك الحلوة
    انا بنزل الصبح بكير مشان احضر محاضرة بس بكون اخدة معي اكلات طيبة يعني رايحة شمة هوا
    ومتل الشاطرين بعد اول صف متل الشاطرين
    قام مرة دكتور بالفصل التاني فكرني اني كتير شاطرة
    سألني انت عم تنافسي شي عالمركز الاول عالدفعة؟
    وانا كان عم يحترق قلبي ما عرفت شو بدي قله
    خجلت قله اني مو عرفانة كيف بدي انجح بالمواد .....بحضر مشان اعرف عن شو المادة لانو وقت بفتحها بالبيت عم فوت بالحيط

    انا لسا عم استنا تحكولي شو كان يصير معكون
  • تم تعديل 2009/09/20
    تسلمي حبيبتي بانادول
    واللهانا صارت شغلة المقعد الامامي ما بتهمني بنوب مو لاني صايرة جامعية او هيك شي بس ماعاد في ضرورة نقعد قدام لانو ااستاذ بيحضر معو اوراق الدرس وبيظل يقرا فيها وكاننا لا نجيد القراءة (مرة قالوا الطلبة للاستاذة نحنا نعرف نقرا اذا فيكي ياريت تشرحي شوي)
    وبعدين نروح نشتري هديك النسخة من الدرس ونقراها لحالنا ونحفضها
    هيك صايرة الدراسة
  • Dr.AhmadDr.Ahmad مدير عام
    تم تعديل 2009/09/21
    بس بانادول الدكتور ناظم أحمد هلق حباااااااااااااااااااااااااااااااااااااااااااااااااااااااااااااااااااااااااااب كتييييييييييييييييييييييييييييييييييييير على عبرة أيامنا انتو احمدو ربكم انو عم ينزل محاضرات على أيامنا حتى محاضرات ما كان في و على فكرة أنا كنت بدي قص المادة لو ما أمي أقنعتني روح قدمها و رحت و درستها كلها بنص يوم و نجحت ... عالحد .... اما نجاح مبهدل الله يبعدو عنك ..... المهم خلصنا منها

    عاشقة العلوم : و عنا نفس الحكاية دكتورة هدا النوع من الدكاترة موجود بكل محل بس اكيد مو كل الدكاترة هيك
  • تم تعديل 2009/09/21
    [align=center]شغلة القراءة بدل الشرح قصة عادية جدا
    وهادا السبب اللي بيخليني ما أحضر بعض المحاضرات النظرية

    في قصة صارت معي بس حابب اذكرا
    أيام فحوصات العملي والمقابلة مع الدكتور
    تدخل البنت (بعض البنات) يقلا الدكتور اسألي حالك سؤال وجاوبي عليه
    لما يدخل الشب ما يترك الدكتور سؤال صعب ما يسألو للشب
    فتصور يا رعاك الله[/align]
  • تم تعديل 2009/09/21
    ريان معك حق كلامك مظبوط يعني هي القصة
    مافيني انكر لانو صار قدامي شي بيشبها كتير

    بس الحق عالدكتور.....
    وكلو بكفة واذا كانت بنت رفيقه بكفة تانية.....ولا اذا كانت من بني جنسه شغلة تانية
    وفقا لتجربتي المتواضعة.....بالمقابلات في ناس دعموني كتير بشكل ما كنت متصورته وبالاحرى مو بس بالمقابلات بالنظري العملي كمان العلامات ملعوبة شوي اما للاسوأ او للاحسن
    بنفس الوقت كان الله باعتلي واحد من المعيدين عالطالعة والنازلة يبهدلني
    الله وكيلكون نضفت ارض الكلية على قد ما كان عالطالعة والنازلة يمسح فيني الاراضي
    حتى تقليع قلعني....ما تشرشحت غير على ايده.....حارقلي قلبي
    هادا كله لانو مرة رديت عليه وجاوبته بصراحة انو انا مو مطلوب مني اجي سمعله شي ما شرحه
    يعني اعتبرها نوع من الوقاحة انه يحكي كلمة قوم رد عليه بعشرة


    يعني شغلة المقابلة بدها مسايرة كتير كتير
    من هداك اليوم عرفت انو بلاها كرامتي وقت بيتعلق الموضوع بمستقبلي

    بس عنجد حتى نحنا البنات بيناتنا منحكي انو الشباب بينظلمو كتير بالعملي وحتى كمعاملة غير العلامات
    لما شب بيتحرك حركة الدكتور بياكله والمصيبة ما بكون الولد قصده شي
    بينما البنات ما بفوت لسانون لحلقون معلش هدول
    في عنا دكتور بقول للشباب عيب تحكو استحو على حالكونبس حديث الصبايا ما بيتأجل
  • تم تعديل 2009/09/21
    هههههههههههههه بس هي الشغلة نحنا تصير معنا كمان لما تكون حالة دكتورة والله
    نحنا عننا استاذة البيو فيزيك هيك تعامل الشباب بطريقة عكس البنات
    اما عن شغلة انو القراءة بدل الشرح فانا تعودت عليها وصرت ما بحب احضر المحاضرات
    بتصدقو انو مادة الوراثة في السنة كلها حضرت مرتين او ثلاث مافي اكتر والحمد لله درستها لحالي ونجحت فيها
    هي السنة المادة الوحيدة الي كنت حب احضرلهاهي مادة الكيمياء العامة لانو الدكتور الي بيدرسنا عنجد دكتور مو لعب يعني بتطلع من الدرس فاهم ولو كنت حمار واكتر شي بيعجبني انومابيكون ماسك ولا ورقة
  • محمد حلبيةمحمد حلبية عضو ماسي
    تم تعديل 2009/09/21
    الله يخليناياكي بانادول تقول الحق و لو على حالها:282: شكرا كتير إلك و لعاشقةالعلوم و عنجد يا جماعة الهشي بصير معنا كتيررررر:113: و للأسف و مرة صديقي حكالي أنو بإحدى جلسات العملي عطى سن محضرو للمشرف ليحطلو العلامة و بعد النظر و التفكير حطلو d يعني وسط و راح مباشرة و عطى نفس السن لبنت معو بالفئة و لنفس المشرف مباشرة حطلها a يعني جيد :297:فتصور يرعاك الله ؟؟؟؟؟؟ :271:
  • Dr.AhmadDr.Ahmad مدير عام
    تم تعديل 2009/09/22
    بانادول بذمتك هي انتي اللي طلع صيتك بالكلية .............. و الله العظيم انو الخبر ما ضل حدا بدفعتي ( هذا اللي بعرفوا بجوز مو الكل بس كل اللي بعرفن ) إلا و دريو بالخبر و بدك الصراحة كانوا عم يمدحو منها ( يعني منك )

    بس لا تفرحوا كتير يا بنات صحي بالسنوات الاولى بيدللوكم بس الدعم ( من النوع اللي ما كنتو تشوفوا ) بيبلش جزئيا من الثالثة و بالرابعة عليكم خير ............... مو بشارة بس تذكريني بهالحكي
  • تم تعديل 2009/09/22
    طول بالك حكيم
    مين هي البنت؟
    شو عملت؟
    انا بمشي من الحيط للحيط وبقول يا رب السترة
    والقط بياكلني انا وعشايي
    مافي غيره هاد المخلوق ....ما كان على زمانكون
    كان يعمل فينا كل جلسة عملي مشان التسميع فلم بلا زلم

    اما بخصوص العلامات وغيره كلنا نفس الشي
    ليكون مشان الفحص العملي للفيزيا؟
    مافهمت عن شو بالضبط
  • تم تعديل 2009/09/22
    dn>ammar
    هادا الحكي مظبوط في شي منه كتير
    بس ما بعرف هيك الله خالق الناس

    بالمناسبة انا بحب كليتكون كتيركتير
    بنبسط بشوفتكون وانتو عم تشتغلو
    ولسابتطلعو بتاكلو من عند فرند مو؟ولا من عند ابو الزوز
    كاشفتكون
    معناتا يا حرام مشان هيك عندكون في ناس بالكلية ما بيرضو يشتغلو لبنات......من سم البدن اللي آكلينه
    هههههه

    صحيح حكيم ما فهمت شو مشان الدعم اللي عم تحكي عنه بالسنين اللي جاية
    يا الله بس لو يدعمونا بعالامات النظري شوي
    بيطلع معدلي بجنن
  • Dr.AhmadDr.Ahmad مدير عام
    تم تعديل 2009/09/22
    هلق دكتورة هي الفلم اللي حكيت عنو ما كنت بعرف مين البطلة شخصيا ... بجوز تكون غيرك اذا كنتي عم تمزحي لانو نفس العبارة اللي قلتيها انتشرت

    مشان الدعم : في بعض الدكاترة ما بيميزوا شب و لا بنت بالسنوات القادمة و على اعتبار انو البنات متعودات عالحكي لذلك يا ما بيطالعن ( بمعنى آخر ....... ) الدكتور من المحاضرة
    اما مشان معدل النظري بالتالتة اي بتندعموا بس بالرابعة ... بيبان الطلاب على حقيقتن
  • تم تعديل 2009/09/23
    والله ماكنت عم امزح مظبوط نفس الحكي بس مستحيل يكون انتشر الموضوع

    ما بتصور كون انا البطلة
    بتكون البطلة حدا تاني
    يادوب بعرف حالي بالكلية

    عموما بالتوفيق