الحالة التطويرية للموقع + عرض التصميم الجديد للنقد

AmmarAmmar عضو نشيط
تم تعديل 2011/03/14 في الاقتراحات و التطويرات
السلام عليكم,

حبيت بس اعرض عليكم التصميم الجديد للموقع مشان اعرف رأيكم فيه, هوي حاليا قدي التطويل وجاري العمل على اضافة تحسينات خلال الايام القادمة ان شاء االله تعالى ...

الصفحة الرئيسية للموقع

بدي منكم مساعدة في تصميم الصفحة الرئيسية, ملاقي صعوبة في تصميمها وحابب اسمع شوية آراء قبل ما باشر فيها, حاليا هي نسخة عن التصميم السابق فقط لا غير !

- هل الألوان مناسبة
- ماذا يجب برأيك أن يكون دوما في الصفحة الرئيسية
- ماذا لا يجب ان يعرض هناك
- هل القوائم كافية لايجاد المطلوب
- في أي مكان في الصفحة يجب أن يكون البحث متوضعا وهل تحبذو ربط البحث بجوجل (أقصد جعل جوجل هو الذي يبحث في الموقع وعرض النتائج في الموقع مباشرة) !
- هل تريدون أي تطوير جديد في الموقع
- هل هنالك خلل في احدى صفحات الموقع
- ما هي أهم الأخطاء التي يجب العمل على اصلاحها حالا
- أي مقترح آخر...

آخر طلب هو أن تعطوني تقييم عن أداء الموقع خلال الأشهر القليلة الماضية, حيث أنه لدينا خبرين:

- الأول: الموقع قفز في جوجل واحتل مراتب عالية, ولدينا روابط معتمدة ضمن جوجل حاليا (أقصد بالمعتمدة أي أنها مختصة بنا كالمواقع العالمية, هنا مثال يوضح القصة للجميع.

- الثاني: هو أن السيرفر عانى من بعض الضغط ليس فقط بسبب كثرة الزوار, ولكن أيضا بسبب تضخم موارد الموقع من ملفات جاهزة للتحميل وغيرها, حيث أن الموقع يحتوي حاليا على كمية بيانات ضخمة جاهزة للتحميل مباشرة من عندنا, وليس من مواقع مشاركة الملفات التقليدية, وهذا يفيد المستخدم في سرعة التحميل وعدم انتظار مدة معينة بين تحميل وآخر .... الخ.


سنقوم بالعمل وفقا للنتائج في هذه المشاركة, لذا أرجو الموضوعية والحياد في النقد !

ملاحظة: أرجو وضع السلبيات فقط في هذه المشاركة, أما الايجابيات فتذكر فقط اذا أردتم فيها تحسينات معينة !


آسف للاطالة, وشكرا لكم سلفا :wink:

عمار

المقترحات الجديدة لتطوير الموقع:

- جوجل كمحرك البحث في الموقع (البحث ضمن الموقع مع عرض النتائج ضمن الموقع أيضا). تم اعتماد جوجل كمحرك بحث للموقع.

- تغيير ألوان الصفحة الرئيسية من الأسود لألوان متوافقة مع المحتوى الطبي, مقترح: أخضر + أزرق + أبيض
بانتظار تحديد الألوان لبدء العمل عليها, تم تهيئة كل التصاميم للتعديل.

- تغيير شعار الموقع حيث أنه يدل على أنه موقع طب أسنان, مطلوب تصميم احترافي أكثر !
في حدا عندو فكرة حلوة والموقع مستعد يدفع.

- اضافة عناوين للصفحة الرئيسية أكثر أهمية, وازالة الأرشيف, وتصحيح بعض العناوين المربوطة بشكل خاطئ !
- تحديث الموقع ب: عنوان عن أخر المؤتمرات والنشاطات الطبية, مدونات خاصة بالموقع
- نقل التسجيل للصفحة الرئيسية
جاري العمل عليه.

- تغيير استايل المنتدى لأفضل منه
جاري العمل عليه.

- كتابة لمحة بسيطة عن الموقع وفكرته في الصفحة الرئيسية مباشرة (أنا مع الفكرة)
بدنا كاتب ماهر لصياغة نص أدبي جميل لا يتجاوز 250 كلمة.

- اعادة صياغة اسم الموقع لـ "العيادة العربية السورية"
غير ممكن: لأسباب كتيرة منها اعتماد الكلمة في مناطق حساسة صعب تغييرها.
على كل حال الموقع بيدل على انو عربي بمجرد انو محتواه عربي.

- ترتيب الصفحة الرئيسية ضمن مربعات بشكل عمودي بهدف التنسيق وتفادي تشتيت فكر الزائر
جاري العمل على تنسيق جديد للصفحة الرئيسية, مختلف عن الحالي تماما, وسيرضي الجميع ان شاء ا لله.

- تغيير شريط القائمة الرئيسية في الموقع وجعله قائمة ضمن المحتوى
الطلب صعب تطبيقه حاليا, خصوصا أن القائمة الرئيسية أسهل من حيث الوصول للخدمات الأساسية في الموقع, لكن سيتم النظر فيه بعد الانتهاء من الصفحة الرئيسية.

- اصلاح بعض المشاكل البرمجية في المنتدى.
جاري التحديث لنسخة أفضل, وتم بحمد الله سد بعض الثغرات الأمنية البسيطة.

- اضافة (آخر مشاركات العضو) أو (أهم مشاركات العضو) في توقيع الأعضاء.
آسف, كل البرمجيات الموجودة في السوق تعمل على تحميل السيرفر بشكل أعلى من طاقته (طبعا مو بشكل عام, لكن أقل تأثير سيؤثر على تقييم الموقع في جوجل خلال ال3 أشهر القادمة وهي فترة اعادة تركيب خوارزمية جوجل لتصنيف المواقع المعلن عنها قبل اسبوع تقريبا).

- تم اصلاح بعض مشاكل التصميم وجاري العمل على وضع بعض اللمسات الفنية في الموقع (نعدكم بأنها ستكون جميلة).


أمور ادارية:

طبعا الكل يعلم أننا نستعمل اعلانات جوجل لدعم موقعنا, لذلك أرى أنه لابد للجميع أن يطلع عليها ويكون ضمن الصورة بكل وضوح, حيث أن الموقع للجميع, لذلك سنقوم ان شاء الله تعالى بنشر دخل الموقع المالي مع صور التقارير من جوجل + لمحة عن مصاريف واحصائيات الموقع وبعض الحقائق الجديدة.
- تحديث: جاري اعداد التقارير المالية وتقارير احصائيات الزوار. النشر سيكون خلال اسبوع ان شاء الله تعالى
«1

التعليقات

  • صيدولةصيدولة عضو ذهبي
    تم تعديل 2011/02/24
    اول شي الشكر الك اخ عمار عالمتابعة والتطوير الدائم وشكرا لأنك عم تاخد رأينا بهالشي ...... الله يعطيك ألف عافية ...
    بصراحة انا ماكتير بفهم بالبرمجة وتقنياتها والاخطاء والاصلاحات وهالقصص ... بس رح اعطي رأيي المتواضع ..:redface:
    بالنسبة للصفحة الرئيسية ... بصراحة اول ما فتحتا ما عجبني اللون الاسود اللي فيها ... انو حسيتو مانو مريح ... والصفحة بشكل عام جامدة شوي ... مدري ليش بس انا هيك حسيتا ... اما بالنسبة للمحتوى المعروض بظن انو كافي ووافي ... ( وع فكرة ليش بالعناوين احيانا في كلمة وحدة بخط مايل والباقي عادي ؟!)
    وفكرة رابط غوغل كتير ظريفة وبتريحنا اكتر ...

    في شغلة كمان ... ليش ما بيكون البانر تبع الموقع اكبر او فيو شغل اكتر ؟؟:whistling: مع العلم انو الصورة كتير حلوة ومعبرة

    كأني حكيت كتير .... ان شا الله يكون في فايدة من هالحكي ... وبظن إلي رجعة لهون ..:cool2:
    بس كلمة اخيرة ... الموقع ( برأيي) رائع شكلا ومضمونا ... الله يجزيكن كل خير ويعطيكن الف عافية ..
  • AmmarAmmar عضو نشيط
    تم تعديل 2011/02/24
    شكرا صيدولة, كلام بيعبر عن ذوق بصراحة !

    عالعموم, بالنسبة للبرمجة وتقنياتها, ما في داعي حدا يفهمها لحتى يعطي اقتراح أو ملاحظة, هيي لازمة للتطوير لكن التطوير بدو خطة والخطة بدها أفكار والجيجة بدا حبو, والحبو بالعلية والعلية مسكرة.... الخ القصيدة.

    بالنسبة لألوان الصفحة الرئيسية أنا ما حبيتها, بس ولكن متل ما بتعرفو, الموقع السريع أفضل من البطيء, يعني أول شي بدنا المحتوى وسرعة الوصول اليه, بعدين منشوف التصميم لذلك نشرتها قبل ما عدل الألوان, بس رح حط تركيبة لونية جديدة, وياريت حدا يعطيني اقتراح مشانها كمان, مع انو عندي شوية اقتراحات, بس متواضعة كتير (بيني وبينكم ما عندي ذوق بالألوان بشكل عام أنا :( )

    انو الصفحة جامدة, هادا اللي زاعجني وعم اشتغل حاليا على أكتر من فكرة بس المشكلة أفكاري ما كتير عم تطلع على مقاسات الوضع, بدي منكم مقترحات, يعني شو ممكن نحط فوق صناديق الموسوعات بالصفحة الرئيسية مثلا !!!

    بالنسبة للكلمة المائلة بعدها عادية, فهادي ميزة (في مقولة برمجية بتقول: كل خطأ غير متوقع فهو ميزة خفية ههههه ) بس هي بجد ميزة من الأساس :s

    بالنسبة لجوجل, حاليا بدأت اشتغل على جعل جوجل هوي محرك البحث ضمن الموقع, لأنو بصراحة زلمة بيفهم (اي بيفهم شو بدها بالحكي !!! )

    أما بالنسبة للشعار, فالمشكلة صيدولة انو بفريقنا مافي مصمم محترف عندو خبرة والأهم أفكااااااااااااااااااااااار !!!

    هلأ اذا في ملاحظات صغيرة أو كبيرة أو مأمطة بالسرير يا ريت تقولوها, لأنو بدي صحح المشاكل الحالية وابدأ تطوير شغلات جديدة للمستقبل (مثلا العيادة الافتراضية, والموسوعات التفاعلية, وكم شغلة جديدة شوي...)


    شكرا لردك صيدولة, جبرتي خاطري بصراحة :redface:
  • حكيمحكيم مشرف حلقات البحث و الاستشارات الطبية
    تم تعديل 2011/02/24
    يعطيك العافية عمار والله حهد واضح تشكر عليه ومنيح اللي عفيتنا من الإيجابيات لأنها أكتر من أنو تنذكر
    هلأ هنن شغلتين أول شي التصميم
    انا بوافق الدكتوره بالنسبه للون يعني موقع طبي بتوقع أنو لازم يكون اللون فيه مريح نفسيا مثلا الأخضر أو الأزرق مع أرضية بنقش خفيف (يعني شي مختلف)بتمنى لو اقدر شارك بالتصميم بس المشكلة أنا بتعامل مع الورق الأبيض وما بفهم بالبرمجيات وبالنسبة للشعار كمان لازم يتغيير أو عالأقل يطور ويصير بعبر عن الموقع بشكل أفضل صاير أميل لموقع تخصصي طب أسنان!!!
    أما بالنسبة للمحتوى فما بعرف إذا كنت مسؤول عنه بس في كم ملاحظة
    حسيت الصفحة صغيرة ولسه بتتحمل مواضيع وعناوين متميزة حاليا مافي شي محدد براسي بس رح ارجعلك مرة تانية استناني:wink:
    أرشيف الأخبار ما حبيتو وما حسيت إنو بنفس مستوى العناوين المطروحة فضلا أنو قديم كتير والمحتوى قليل
    واخر شي ما في عناوين كبيرة عن مجال طب الأسنان العظيم معقول يا زلمة؟؟؟؟
    لحظة العنوان عن الة جديدة لقلع الأسنان غلط الموضوع عن معالجة النخر وشتان بين الموضوعين!!!
    على فكرة حبيتها شغلة العيادة الافتراضية! شو يعني؟؟؟
  • AmmarAmmar عضو نشيط
    تم تعديل 2011/02/25
    شكرا كتير حكيم, بصراحة رؤية جميلة وأفكار كتير حلوة, وان شاء الله رح طبقها كلها بالنسبة لألوان الموقع وبالنسبة للشعار فأكيد رح غيرو بأسرع وقت ممكن لحتى يعطي نصيب لكل أقسام الموقع طب بشري وصيدلة وأكيد طب أسنان.

    هلأ بالنسبة للتصميم, فنحن على فكرة منصمم بنفس الطريقة تبع الورق الأبيض, ولمعلوماتك, كل أمر في الكمبيوتر الو مشابه في الحياه الواقعية, لذلك نجح الكمبيوتر في اختراق العالم بدون دليل, لأنه مأخوذ من أمور ملموسة, مثل الملفات والمجلدات, مافي شركة أو مكتب أو أي مثقف ما عندو مصنفات فيها أوراقه الهامة, ونفس الشيء تصميم الويب, أما البرمجة فهي تطبيق لبعض الخوارزميات بصيغ مقبولة للكمبيوتر, وبالتالي مافي كتير فرق, عموما شو بدكون بكتر الكلام هلأ...

    العيادة الافتراضية هيي مخطط مشروع, وعلى فكرة لسا ما انطرح قدام حدا لحد الآن, ورح انشر تفاصيل بسيطة عنه هنا لأول مرة وهو كالتالي:

    باعتبار نحن اسم موقعنا العيادة السورية, وبالتالي أي زائر رح يتوقع وجود عيادة (شي طبيعي) وطبعا نحن عنا عيادة حاليا, لكنها محدودة على بعض الردود, وصعب الوصول اليها مباشرة من قبل المستخدم...

    لذلك أنا فكرت انو نعمل مشروع عيادة افتراضية:

    - يدخل الزائر, وبدون أي تسجيل أو تعقيدات المواقع التقليدية يقوم بملئ استمارة دخول (متل لما بيدخل على عيادة شي طبيب وبتستلمو الممرضة, رح تكون الصفحة حلوة متل بعض الممرضات)
    - بعدين بيدخل الأعراض الأساسية اللي عندو مثال: عندي ارتفاع حرارة, وجع في الصدر, ضيق تنفس... الخ
    - بعدها بيدخل أعضاء مختصين بيقومو باعطاء الرد المطلوب حول نوع الحالة بشكل نظري وأنواع الأدوية علميا "فقط".
    - طبعا الموضوع ما انتهى هون, لأنه هيك رح يكون شيء غير موثوق, بنفس الوقت رح تتم العملية التالي:
    -- المريض رح يقدر يرد كمريض على جواب الدكتور
    -- أطباء آخرين ممكن يكتبو تعليقات على الحالة
    -- أطباء آخرين ممكن يقيمو التشخيص المبدئي للطبيب الأول

    - الطبيب ممنوع يوصف أي دواء, وسنقوم بتحذير المريض بوجوب زيارة طبيب وعدم الاعتماد على ما هو مكتوب فقط بمطابقة الأعراض على نفسه...

    طبعا المشروع متل ما عم قلكون عبارة عن أفكار على ورق لكني عم ادرس الفكرة بشكل جدي وان شاء الله اذا لقيت الوقت الكافي والتشجيع وطبعا الأفكار الكافية لانجاز الفكرة بالطريقة الأمثل (والكمال لله عز وجل, والسعي واجب) فرح نتعاون كلنا على انجاز الفكرة وخصوصا انو تلقينا في الفترة السابقة عدد كبير من الاستشارات الطبية على بريد الموقع الرسمي ومن خلال صفحة الاتصال بنا.

    بس بصراحة أنا أفكاري شوي جامدة, ومازلت محتار, وخصوصا اني عم اطلع على بعض المواقع الطبية الأجنبية, بس ما عجبني منها شيء, لأنها إما مقعدة كتير وغير قابلة للفهم بسهولة من قبل المواطن العربي العادي (مثال أنا) أو انو ما فيها تصميم واضح للفكرة اللي عم فكر فيها !

    يا شباب أنا بانتظار أفكاركم هون, وان شاء الله رح تشوفو تطور كبير بالموقع خلال الاسابيع القادمة وخصوصا جعل الموقع أكثر تفاعلية, وأسرع للتصفح وخصوصا مع مشكلة البطء الحالية, وبعض المشاكل التصميمية وتنسيق المحتوى وغيرو...
  • حكيمحكيم مشرف حلقات البحث و الاستشارات الطبية
    تم تعديل 2011/02/25
    أول شي مشكور عالتفاعل اخي عمار والله يجزيك عنا ألف خير
    اذا كان هاد قصدك بالعيادة الإفتراضية فعمرك أطول من عمري لأني كنت رح أقترح عليك تنقل بشكل أو بأخر قسم الاستشارات الطبية بالمنتدى للصفحة الرئيسية لأني مقتنع متلك بأهميته للموقع والحكي اللي قلته عنه حكيناه تماما لما افتتحنا القسم بس إنت خليته أحلى وأكتر أكاديمية
    على فكرة في مواقع عربية تصميمها روعة ولولا الخوف من أنو تصير دعاية كنت دليتك على كم موقع طبي عربي متميز بس واضح إنو ما بينخاف عليك ورح تصل للتصميم اللي يرضيك ويرضي الكل أما أنو الصفحة جامدة فالسبب يا صديقي أتو ما فيها شي متحرك وحط العناوين ضمن مستطيلات كلاسيكية خلا الصفحة نمطية شوي مع أنو الذوق السائد حاليا كلو عم يتجه لبعض العشوائية بالفن
    بعض الإقتراحات : بدنا عنوان عن أخر المؤتمرات والنشاطات الطبية , مدونات خاصة بالموقع , نقل التسجيل للصفحة الرئيسية, تغيير اللوك تبع المنتدى لأنو بيشبه كتير تبع syrdent
    ما بعرف شو بيطلع معي كمان بس أنا معك على طول الخط ومتابع لجهودك الجبارة والله يعطيك ألف عافية
  • صيدولةصيدولة عضو ذهبي
    تم تعديل 2011/02/25
    فكرة العيادة الافتراضية كتير حلوة وان شا الله تتطبق ... وانا مع حكيم انو تكون الخلفية مزخرفة او فيها شي حركة بسيطة وانو تكون الالون من الاخضر والازرق ودرجاتهن ( لو مني بتمنى تحطها زهري وفوشيا بس اكيد ماحدا رح يقبل)
    بس شو مشان فكرة ميرة بعرض مقتطفات من مشاركات العضو ؟؟
    وكمان شو رأيكن بالصفحة الرئيسية تحت العنوان يكون في جملتين خفاف ظراف يعبرو عن الموقع وعن اتجاهو واهدافو ؟ !
    ومشان المؤتمرات والنشاطات الطبية لو بيكون في متابعة دايمة لهيك شي بيكون كتير منيح وطبعا ممكن نحنا (الاعضاء ) نساعد بهيك شي.. انو كأنو يصير قسم اخباري متابع لهالامور ...
    في سؤال صغير من زمااااااااااااااان ع بالي اسألو ... شو معناتو " معدل تقييم المستوى " اللي حطيتوه من فترة؟؟

  • dr.Hazemdr.Hazem مدير عام
    تم تعديل 2011/02/25
    تغيير ستايل المنتدى قيد العمل عليه ....
  • suzysuzy عضو ذهبي
    تم تعديل 2011/02/26
    بشكرك أخ عمار على التفهم و محاولة تطوير المنتدى الله يعطيك العافية
    كمان أنا عندي مشكلة مع اللون الأسود نحنا بموقع طبي و لازم تكون الألوان مريحة للأعصاب مشتقات الأزرق و الأخضر كتير مناسبة (مع اني بأيد ذوق صيدولة )
    صناديق الموسوعات كتير مناسبة و كافية
    فكرة العيادة الافتراضية فكرة ممتازة و رح تضاعف عدد زوار العيادة برأيي
    بالنسبة للتسمية شو رأيك دكتور حكيم نسميه موقع الصيادلة (أكيد عم بمزح)اسم العيادة عظيم و كتير معبر صاير متل مظلة كبيرة بتندرج تحتها كل الاختصاصات
    ممكن نضفلو كلمة العربية ليصير العيادة العربية السورية ليضم الأعضاء من كل الأقطار العربية
    بالنهاية هيدا رأيي و أنا على ثقة انكم شباب أصحاب عقل ناضج و فكر واعي
    بالتوفيق ان شاء الله
  • noonenoone عضو نشيط
    تم تعديل 2011/02/26
    اولاً شكراً كتير على كل شيء وكمان لانكن بتخلونا نحس انه نحنا عناصر مشاركة فعلاً في المنتدى ,
    هلق انا عندي حكي بس مابعرف راح تفهموا عليه , لانه انا ما بحسن اشرح !!!
    المهم بوافق الاعضاء على تغيير اللون والشعار
    وكمان بدي ضيف انا حاسس انه الصفحة الرئسيية فيها كتير اشياء وعجقة !!!
    يعني لو فيه مجال تترتب اكتر من هيك , يعني المربعات لو تترتب بشكل عمودي او اي طريقة المهم تكون ارتب

    بالنسبة للشريط الاسود يلي فوق ( الرئيسية , المكتبة الطبية .......الخ
    لو فيه مجال يكون كل عنوان تحته الفروع تبعته يعني متل المربع يلي يطلع تحت الموسوعة الطبية

    يارب تكونوا فهمتوا ..

    ايه في مشكلة كانت بتواجهني في المنتدى هيه لما اروح للصفحة الرئيسية للمنتدى
    واضغط على موضوع بيرجع يفتح لي نفس الصفحة الرئيسية ,
    هلق مابعرف هالمشكلة عندي بس او في حدا بيحصل معه هيك !!؟
  • AmmarAmmar عضو نشيط
    تم تعديل 2011/02/27
    يا جماعة أنا رجعت عدلت الموضوع وكتبت باختصار أهم التطويرات اللي لازم نساويها خلال الفترة القادمة, في حدا عندو شي تاني ؟

    بعدين ما حدا منكم حكالي كيف كان أداء الموقع خلال الأشهر الماضية بشكل عام, محتاج منكم رد على هالموضوع مشان اقدر اشتغل كمان على سرعة الموقع, لأن يمكن نضطر كمان لتحديث السيرفر وشراء بعض الموارد الجديدة للموقع في حال كان أداء الموقع بشكل عام (ضعيف وغير مرضي) !!!

    أخيرا رح ننزل تقارير من الموقع, سواء من حيث احصائيات الزوار, أو من حيث الأمور المادية: الدخل والصرف للموقع, ومن حيث بعض الحقائق حول الموقع اللي رح تعجبكم بالفعل, أنا فخور جدا اني من أعضاء هذا الموقع المميز بكل صراحة :)
  • صيدولةصيدولة عضو ذهبي
    تم تعديل 2011/02/27
    بظن هيك متل مابيقولو ... "عداك العيب " و "كفيت ووفيت" و " وماقصرت " .... وأدامك الله ذخرا لهذا الموقع الرائع ... ونحنا اكيد جاهزين لاي مساعدة منقدر نقدمها (هاد اذا طلع بإيدنا )

    اخ عمار مابعرف كيف نحنا بدنا نقيم اداء الموقع ... برأي الموقع كتير مرضي واداؤه جيد جدا (باستثناء المشكلة اللي ذكرها "noone" لانو عندي نفس الشي) ...
  • Dr.AhmadDr.Ahmad مدير عام
    تم تعديل 2011/02/27
    يا عيني عليك يا ابو حسان ... انا بعرف حالي متأخر كتير لكن قلتلك لأني خلصت دراسة مادة دخلت لكافئ نفسي بوجودي بينكم ...

    انا ع فكرة كنت حابب ضيف موضوع مماثل لكن ضيق الوقت حجبني ...

    يمكن سألتني من قبل كتيييييييير و بتعرف شو بدي احكي لكن لازم احكي ما هيك ..

    بداية انا اللي صممت الشعار و بعرف انو فاشل ( من ناحية انو غير مناسب بشكل كامل ) لكن متل ما قال عمار أول شي ماني مصمم اختصاصي و تاني شي و اللي هو الاهم بصراحة و اللي لازم تركزولنا عليه كتيير ( خاصة حكيم لانو طب الاسنان في فن يا ريت لو عندك مقترحات و لو عالورق و نحن منفذها عالكمبيوتر عند مصمم .. الغاية الاساسية هي الفكرة و ليس من يصمم على الكمبيوتر )

    فكرة العيادة الافتراضية اللي حكى عنها عمار حاليا نحن عم نشتغل عليها من خلال محاولة التنسيق مع بعض الاطباء المختصين ... و طبعا جزيل الشكر للدكتور عمار عدي اللي حابب وجهلو شكر خالص من القلب على مساهمته الفعالة تعاونه معنا ميدانيا ... الدكتور عمار و في أطباء تانيين ممكن يساعدونا بالقسم الاستشاري لكن بدا الشغلة شوية جهد كمان و يا ريت لو في أطباء كمان بتعرفون ممكن يساعدونا بالعيادة الافتراضية ...

    عمار بتصور انو نموذج برنامج العيادة السورية اللي عندك من زمان ممكن يساعدك كتير و وقت يكون بدك استمارة متكاملة لمريض ما صعب أبدا انو نجيبها و متوفرة

    فكرة القسم الاخباري ... او خليني سميه الصحفي فكرة مميزة كتير لكن منرجع لنفس المشكلة ... الوقت ... سواء كنت أنا لسه دراسة و تخرج أو علي نفس الموضوع او حتى حازم ... كمان عمل و عندو خدمة العلم ... و القسم الاخباري كلنا بيعرف انو بدو وقت كبير ... لكن ان شاء الله بعد أزمة التخرج رح زيد النشاط الميداني من ناحيتي و اسعى لدعم هالقسم

    بالنهاية: بتمنى تعذرونا عالبطئ بتطوير الموقع لانو حتى عمار طالب كمان و عندو التزامات كتيرة و الحمد لله هلئ ما بعرف يمكن عطلة يمكن مخلص دراسة ... و ما تنسوا من دعواتكم ... المسكين من مللو عم ينكت بالموضوع ههههههههههههههه

    عمار يمكن ما انتبهت لهي الجملة من رد صيدولة
    بس شو مشان فكرة ميرة بعرض مقتطفات من مشاركات العضو ؟؟
    شو مشان هاك " أخر مشاركات العضو في التوقيع " ..........؟؟؟!؟!؟!؟!؟!
  • Dr.AhmadDr.Ahmad مدير عام
    تم تعديل 2011/02/27
    و مشان : معدل تقييم المستوى ... هي صورتين الاولى للتقييم و التانية مشان الألقاب من لوحة تحكم المنتدى ... بتمنى تكون وصلتك فكرة التقييم من خلالن

    2..jpg

    1..jpg
    اذا في القاب أفضل يا ريت تقلولي عليها ... اسمو مسيرة التطوير شغالة هههههههههههههههههه
  • suzysuzy عضو ذهبي
    تم تعديل 2011/02/28
    يعطيكم ألف عاقية شباب
    عجبيني فكرة العضو الذهبي بس يا ريت يكون جنب كلمة العضو الذهبي كام نجمة عم تلمع^%$
    فيه شغلة كتير حلوة أنو كل الأعضاء مهتمين بتطوير الموقع و دفعو للأمام
    و الكل جاهز لأي مساعدة مادية أو معنوية
  • صيدولةصيدولة عضو ذهبي
    تم تعديل 2011/02/28
    شكرا د.احمد عالاجابة ... سؤال كان نابع من باب الفضول مو اكتر ...
    فكرة القسم الاخباري ... او خليني سميه الصحفي فكرة مميزة كتير لكن منرجع لنفس المشكلة ... الوقت ... سواء كنت أنا لسه دراسة و تخرج أو علي نفس الموضوع او حتى حازم ... كمان عمل و عندو خدمة العلم ... و القسم الاخباري كلنا بيعرف انو بدو وقت كبير ... لكن ان شاء الله بعد أزمة التخرج رح زيد النشاط الميداني من ناحيتي و اسعى لدعم هالقسم

    بالنهاية: بتمنى تعذرونا عالبطئ بتطوير الموقع لانو حتى عمار طالب كمان و عندو التزامات كتيرة و الحمد لله هلئ ما بعرف يمكن عطلة يمكن مخلص دراسة ... و ما تنسوا من دعواتكم ... المسكين من مللو عم ينكت بالموضوع ههههههههههههههه

    دكتور هالشي كلنا منعرفو ومقدرين تعبكن بالموقع ... ومتل ماقالت سوزي بظن انو الكل ( معظمنا تقريبا ) جاهز لاي مساعدة مادية او معنوية

    بقيت فكرة صغيرة خطرت ببالي وهي الشغل عالدعاية للموقع بشكل اوسع مثلا بالجامعة عنا وبالمراكز الطبية .... الخ
  • AmmarAmmar عضو نشيط
    تم تعديل 2011/02/28
    شكرا كتير سوزي عالردود الايجابية, وبشكرك صيدولة بشكل خاص, بالنسبة للدعم المادي, تحركو ساوولنا شوية كبة ولبنية, مع شوية تبوله, مشان نشتغل على بطن مليانة, يا أخي الشبعان عمرو ما كان متل الجوعان, ههههههههههههههههههههههه, عم امزح (بس مو كتير, يعني ما رح ارفض أي أطباق, صدقوني حتى لو ملح زيادة :rolleyes2: )

    على كل حال بلشت اشتغل بالصفحة الرئيسية, ويوم السبت القادم رح نعرض التعديلات, آسف ما بقدر اشتغل كتير أثناء أيام الاسبوع بسبب الدراسة, لكن في عطلة نهاية الاسبوع رح حاول ان شاء الله تعالى اتمام العديد من النقاط الواردة في أول مشاركة, ورح نضيف عليها دائما التعديلات والتطويرات المطلوبة مع الاشارة للنقاط التي تمت الانتهاء منها.

    شكرا لتفاعلكم مع الموضوع, بس حابب أعرف من الشباب أكتر عن أداء الموقع في الأشهر الأخيرة, مثلا: بطء في تحميل بعض صفحات الموقع, مشاكل غريبة كروابط غبية (حلوة هي روابط غبية) أو مثلا تصرفات غريبة, صفحات خطأ (404, 505, 500... الخ) أو مثلا صفحات محملة بشكل ناقص (صورة لم تحمل, نص لا يمكن قراءته, أخطاء يعرضها برنامج التصفح) ... الخ

    يتم الآن العمل على التقارير الموعودة حول دخل الموقع والزيارت خلال مسرة الموقع كاملة, وأيضا بعض الحقائق حول موقعنا ومحتوياته .

    بالنسبة لصيدولة, بحب قول انو موقعنا عندو صفحة في فيسبوك, طبعا متل ما بتعرفو مانها نشطة بالشكل الكافي, لكن متل ما بتعرفو الصفحة غير نشطة, فيا ريت تشتركو فيها وتدعو عليها بعض الناس في المجال الطبي: صفحة العيادة السورية على الفيسبوك.
  • حكيمحكيم مشرف حلقات البحث و الاستشارات الطبية
    تم تعديل 2011/02/28
    السلام عليكم :
    شو بدي قول أروع شلة تطويرية ياهيك الحماس يا بلا
    إذا كان قصدك عمار أنو نصوت على المقترحات الجديدة فكلها بنظري رائعة وخلاقة وهي بحد ذاتها رح تكون دعاية للموقع (بس قضية ترتيب الصفحة والعناوين ما بعرف بس أنا حاسس العكس الصفحة كتير كلاسيكية وبسيطة لدرجة مفرطة مقارنة مع غيرنا) ماعدا هيك كل شي أكتر من رائع أنا شخصيا ما لاحظت أي شي (غبي أو غريب) كلو ممتاز ثابر إلى الأمام:laugh::281: (إذا هيك الدعم المادي معناتا الشباب معفيين والحمد لله)
    دكتور أحمد عم تسألنا إذا في دكاترة منعرفن يشاركوا بالعيادة الافتراضية:surprised: !!! ليش وين رحنا نحنا ولا ناوين تخلوه حكر على الدكاتره الكبار أصحاب الخبرة.:cry:... ولا لتكونوا قايمين الاستشارات السنية من الحسبان أصلا .ترى إذا هيك بصير عاطل عن العمل وعالة على الموقع !#&
    الصفحة الإخبارية ما بعرف شو قصدك بالضبط؟ الأخبار بشكل عام ولا الأخبار الطبية(المؤتمرات والندوات) هلأ إذا بشكل عام أنا معك أما إذا الأخبار الطبية فكلنا موجودين ضمن الوسط المطلوب لتأمين هالأخبار ومالا بحاجة لجهد وأنا مستعد أمن كل أخبار طب الأسنان بدمشق
    اخر شي ياريت كل واحد فينا يكتب شعار للموقع متل ما بشوف وإذا بيعطي فكرة للرسم بيكون ممتاز (طبعا أنا أول شخص معني بهالنداء بس والله مشغول ورغم ذلك رح اعمل جهدي )
  • Dr.AhmadDr.Ahmad مدير عام
    تم تعديل 2011/03/01
    اهلا فيكي صيدولة ... و مشان النجوم سوزي .. منحاول فيا ^^

    أما حكيم : اكيد انو الاستشارات السنية مانا خارج النطاق و أكيد انتو محسوب حسابكم و لو حكيم .. بس كان قصدي بالمجالات اللي ما منعرف فيها أطباء مختصين ... اما صفحات الاخبار ... حاليا كان تصوري انو اخبار طبية و الاخبار العامة في كتير مواقع تانية بتعرض هي الاخبار لذلك مافي داعي نشغل حالنا بشي مانو النا اساسا .... برجع بقلك أخي انو صح نحن بالوسط المناسب لكن الوقت المناسب مانو موجود.
  • AmmarAmmar عضو نشيط
    تم تعديل 2011/03/01
    حكيم بدي اشكرك, ولا تخاف, الشباب مانون مطالبين بالدعم المادي بهالحالة, بس نحن كتير كويسين وما منرد أي شي, يعني كاتو من عند شي باتيسيري (ما بعرف شو يعني هالكلمة, عموما حلوة هههه ) أو حتى كنافة, نابلسية, سيالات وقطايف, لك حتى شعيبيات من عند ادلب الخضراء (طيبين شعيبياتو صدقوني)....

    عموما, أنا بلشت عدل الصفحة الرئيسية, لكن كالعادة, ما عندي ذوق للألوان, وبهالمناسبة حابب اطلب مساعدتكم, لكن هالمرة بشكل عملي

    الصفحة الحالية تم تعديل الألوان فيها بشكل سريع فقط, يعني مجرد عرض التعديلات الحالية ومشان دائما تكونو على تحديث, لأني مليت من الشغل وبعدين العرض بالأخير, خلينا نشتغل على شيء حلو خطوة خطوة بدون شغل زائد غير مرغوب...

    هلأ أكيد الصفحة ما حلوة, وأكيد الألوان فظيعة (قلتلكون ذوقي غريب, ما حدا صدقني) بس عموما هي على طلبكون ألوانها أخضر وأزرق :surprised: :surprised: :surprised:

    عموما, أنا حاولت آخد الألوان من أداة أونلاين بسيطة ورائعة من انتاج شركة أدوبي وبهالمناسبة حابب شارككون فيها, أداه رائعة بتساعدكون كتير باختيار الألوان خصوصا لعديمي الذوق أمثالي بهئ

    الأداه (برابط مباشر للألوان التي استخدمتها): http://kuler.adobe.com/#themeID/946607

    هلأ بدي منكون تفتحو الموقع الآنف الذكر (حلوة هي الآنف الذكر هههههه) وتضغطو على اسم الموقع من فوق عاليسار, وتبلشو البحث معي عن شي حزمة ألوان قابلة للتطبيق بالموقع عموما (هيك ما عاد حدا عندو حجة انو ما بيعرف بالكمبيوتر, هي ما بدها ولا حتى أي مهارة, مجرد ذوق, طبعا غير ذوقي الرائع بهئ )
    هلأ مشان تعطونا مباشرة الحزمة, بتلاقو بعد فتح الحزمة بالضغط عليها كلمة اسمها Theme Link كبسو عليه وانسخو الرابط اللي بالمتصفح وشاركونا فيه.

    أول شي الضغط على Theme Link ثم مشاركة رابط الصفحة, لازم يكون متل الرابط اللي شاركتو أنا, فيه رقم بالأخير.


    عموما رح ابدأ أنهي النقاط السهلة مشان نبدأ بمشروع العيادة الافتراضية, وصدقوني رح يكون كتير حلو ومفيد كمان (وعد مني خلال أشهر قليلة يكون ضمن الخدمة وطبعا قابل للتطوير الدائم بعكس المنتدى الجامد اللي بكرهو أنا بصراحة :( لأسباب غير واضحة (معلش قاعد عم تابع الجزيرة, يعني متأثر شوي هههههههههه )
  • suzysuzy عضو ذهبي
    تم تعديل 2011/03/02
    شو هالنشاط عمار كل شوي شي جديد الله يعطيك العافية
    بالنسبة لدعم المعدة تكرم عينك دلنا على طريقة نوصلك فيها يلي طلبتو بعدين شو باتيسري شكلك ما سمعان عن كيك صيدولة:shocked:
    على فكرة نحنا اللوادقة أكلاتنا مزيج من المطبخ التركي و اللبناني على شوية كبب حلبية و محاشي و طبعا سمك بأنواعو :91:
    بالنسبة للنقاط يلي ذكرتها ما عليها غبار أبدا ممتازة*&^*&^
    عندي اضافة نقطة ما بغرف اذا بتعجبكم هيي رسالة ترسل بشكل اوتوماتيكي للعضو يلي بيتغيب اسبوعين مثلا فيها اطمئنان عنوو دعوة من الأعضاء للانضمام مجددا لالهم في أقرب فرصة هالشي كتيربيقرب الأعضاء من العيادة
    أما بالنسبة لتعديل الألوان فأنا أسفة ما عندي مشغل الفلاش يلي بيلزم لهيك ما قادرة فيد$%##
    هلأ عم تلح نحكي عن أداء الموقع و فيه ملاحظة من زمان حابة احكيها و خايفة ما تعجبكم
    هيي همسة عتب على المشرفين أحيانا بيبقى الموقع بدون دخول أحد من المشرفين فترة 12 ساعة و أكتر
    رجاء ما تقولو اني عم خبص أنا بعرف و مقدرة انشغال الجميع بس لازم تلاقو حل لهالمشكلة لأنو فيه ناس بتستغل هالفراغ الاداري و بتنزل مواضيع لا تمت للعيادة و مفهومها بصلة و ممكن تكون مسيئة لسمعة العيادة و مسيرتها:102:و بتبقى هالمواضيع فترة طويلة كافية ليتصفحها عدد كبير من الناس قبل ما تنحذف
    عن جد ما حدا يزعل و الله ما حكيت الا لغيرتي على العيادة مع كل التقدير للجميع دون استثناء الله يديم هاللمة الحلوة و عن جد بدون مجاملة الرقي يلي شفتو بين الأخوة هون ما لقيتو بمكان تاني:redface:
    كل الشكر لكل الجهود يلي عن تنعمل لتطوير الموقع
  • Dr.AhmadDr.Ahmad مدير عام
    تم تعديل 2011/03/02
    عمار أكيد هاد أنت .... حدا يقرصني مشان الله .... كنا بالزمنات ( لما كنا نحن فاضيين ) ننكش عمار مية نكشة لحتى يشتغل شغلة ( طبعا أكيد معذور من وقتو ) و هلئ لما نحن ما عدنا فاضيين منيح صار هو نشيط يا سبحان الله على كل الله يديييييييم النشاط و ان شاء الله دوم ما يوم

    دكتورة سوزي مشان دعم المعدة .. الاكل صعب يوصل لألمانيا بس لحماة بيوصل بكل سهولة و نحن مافي فرق بيننا انا و عمار ما هيك عمار ... بطني و بطنك سوا ههههههه

    النقطة الاهم سوزي و اللي هي الفترة الطويلة اللي ما بيدخل فيها حدا منا ... معك حق تماما و مشان هيك انا بحب أعطي الاعضاء القدامى صلاحيات بالمنتدى ... و بامكانك تعتبري هي دعوة لحضرتك لاستلام صلاحيات بالاشراف مشان التعامل مع هي المواضيع الغريبة اللي بتنضاف كل فترة من أعضاء ( خارجين عن القانون ) ... و موضوع الاشراف هاد سهل جدا جدا ... شو رأيك ؟ بانتظار ردك ؟
  • Dr.AhmadDr.Ahmad مدير عام
    تم تعديل 2011/03/02
    عفوا كمان مشان موضوع الرسالة التلقائية هي عبارة عن هاك و ما صعبة لكن بترجع لنقطة عند عمار و هي انو يلاقي هاك ( برمجية ) متوافقة مع المنتدى بحيث تنفذ المطلوب بدون ما تساوي مشاكل .. و مشان مشغل الفلاش عمار لازم كان يحط مع الرابط مشغل فلاش و ما صار شي ... عمار هلا بعد اذنك اخي ارفق مشغل فلاش للمتصفحات .. لاني مستعجل شوي بدك تعذرني مافي وقت بحبش و ضيفو
  • AmmarAmmar عضو نشيط
    تم تعديل 2011/03/02
    السلام عليكم,

    شكرا أحمد لردك, طبيعي بطني وبطنك واحد, عموما انت هلأ أولى مني بالأكل, يعني لازم تاكل منيح وتتغذى !

    بالنسبة للفلاش, فلازم تزوري هي الصفحة: http://get.adobe.com/flashplayer/ فيها طريقة تنزيل الفلاش وبعدها بتستمتعي بخدمة أدوبي كولر (صدقوني بيساعد كتير باختيار الألوان)

    هلأ عموما أحمد النشاط نابع من الرغبة بتطوير الموقع, خصوصا انو بلشت سنة جديدة, وبعدين بيني وبينك من باب كمان ما يصير عنا شي ثورة بالمنتدى :tongue:

    بس بجد أنا سنة 2010 كانت صعبة شوي بالنسبة الي, وما استقر وضعي حتى بداية سنة 2011 بصراحة, والحمد لله.

    في أكثر من هاك بالسوق, طبقت أكتر من واحد وكلون ما عجبني أداء الموقع فيهم, هيك هاكات مانها من تصميم الشركة نفسها, لذلك عم دور عن شي واحد من شغل الشركة نفسها...!
  • ميرةميرة المشرفة العامة
    تم تعديل 2011/03/03
    الله يبارك فيكم وبجهودكم ..والشكر خاااص للأخ عمار أكيد ..
    اعذروووني على التأخير بالرد ..بس ما شالله الإخوة والأخوات ما قصروا ..
    وتقريبا كل الي ببالي حكوه ..
    بس أول شي لفت نظري إني صرت عم المع لمع ..ماسية ..ههههه
    ومن شدة إعجابي بالموقع ما عم لاقي سلبيات ..
    بالنسبة للقسم الإخباري ..ممكن يكون قسم إخباري عام ..
    يعني أخبار سورية والعالم ..
    وقسم فرعي للأخبار المنوعة ..
  • صيدولةصيدولة عضو ذهبي
    تم تعديل 2011/03/03
    سؤال يطرح نفسه ... شو هو الهاك ؟؟؟ :whistling:

    سوزي عم تعمليلي دعاية وما إلي خبر:shocked: ... ( منيح بكرا اذا ما مشي حال الصيدلية صار عندي مصلحة تانية اشتغل فيها ..:91::91:. )

    ميرة انا مو معك بفكرة الاخبار المنوعة .... خلينا بأخبار مجالاتنا الطبية والصحية والدوائية سواء المحلية او حتى الدولية ....
    مشان الصفحة الحالية ... بصراحة ماعجبتني*&^ ... هلأ الخلفية الزرقا مقبولة شوي .... بس الاخضر الزيتي مو محلو ابدا:237: ... بعدين كيف الخلفية زرقا وبعدين المحتوى خلفيتو ابيض ورمادي ؟؟؟ انو المظهر العام غير مريح للنظر ... بظن الاحسن انو نعتمد الاناقة والكلاسيكية بالالوان ...

    وع فكرة الموقع مافتح معي مع انو عندي مشغل فلاش ... بس رح لاقيلو حلة ... وإلي رجعة لهون :cool2:
  • AmmarAmmar عضو نشيط
    تم تعديل 2011/03/03
    ميرة شكرا لاطرائك الجميل, موقعنا فيه كتير مشاكل وأخطاء وعثرات .... يعني بدو شغل كتير بصراحة, لكن نحن هون عم نحاول نحط النقاط الأساسية اللي لازم نركز عليها تمام التركيز بالشغل !
    بالنسبة للأخبار, فكما قالتلك صيدولة, نحن موقع طبي, يعني الأفضل نضل ضمن المجال الطبي حتى ما حدا يضحك علينا , خصوصا انو ما شاء الله في عنا من كل الاختصاصات, يعني بس ناقصنا تنسيق الجهود !

    هلأ صيدولة بالنسبة لهالمجال, فبدنا شي حدا مهتم منكون, ياخد أخبار أجنبية ويترجمها بشكل مختصر قدر الامكان, وممكن نتعاون سوا بهالمجال بحيث أعمل لبعض الأعضاء حساب خاص بالموقع الأساسي (مو المنتدى) وبعد الدخول بيقدر مباشرة يضيف خبر جديد ويعدل فيه, والخبر بينزل بشكل تلقائي في المنتدى والموقع مثلا !
    يعني الفكرة انو ما نحط كل شي بالمنتدى, لأنو صاير المنتدى متل المكان اللي صعب تاخد منو بسهولة !

    بالنسبة للألوان, فأنا متل ما قلتلكون ورقتي محروقة بالنسبة لاختيار الألوان, بعدين شو هي ما فتحت معاكم الصفحة !!! انتو من سوريا وما تعرفو تفتحو صفحة انترنت فيها فلاش, محجوبة, موقفه, عاطلة, أو حتى ممنوع الوصول اليها !!! طيب شو خليتو لبقية الشباب العرب اللي ما تدربو على البروكسي وهالحيل الطريفة هي !

    في قاعدة بتقول: كل سوري متمرس حتى يثبت العكس (نحن جماعة متواضعين شو بدها بالحكي ! :96: ) !
    حبابين عطوني شي خريطة ألوان مشان اعرف اشتل عليها, صرلي يومين ما استقريت على رأي !!!
  • Dr.AhmadDr.Ahmad مدير عام
    تم تعديل 2011/03/05
    عمار خلص ابشر ... كم يوم و بعطيك ان شاء الله خريطة مرستئة من عندي ... بس سوريا و لا العالم كلو !! ^^

    صيدولة ... انتي ساعدي لعمار و قليلو مثلا بدال اللون كذا خلي لون كذا تاني و هيك يعني بتساعديه أكتر لو حددتي و عطيتي لون محدد و لو بتقدري تعطيه " رقم اللون " بيكون أحسن و احسن أو صورة عينة عن اللون

    عجبتني قاعدة السوري ههههههه الحمد لله صيت فهم و لا صيت ...

    صيدولة : الهاك هو برمجية موجودة بملف ينفذ أمر ما .. خليني بمثال لاني ما كتير شاطر بالتعاريف ... الصورة الرمزية الافتراضية للاعضاء اللي ما ضافوا صورة رمزية ( متل صورة المسنجر مكتوب عليها no photo available ) ... هلئ بالحالة العادية بيكون فراغ مافي صورة لكن في هاك اسمو " الصورة الرمزية الافتراضية " وظيفتو انو كل عضو ما اختار صورة لنفسو هو بيحطلوا هي الصورة مشان ما يضل فراغ ... و طبعا في هاكات كتييييييييير و وظائف كتييييييييييييييييييييييييييييييييييييييييييييييييييير

    مشان موضوع المنتدى ... ضمن خططي المستقبلية هو اني اخد مواضيع من المنتدى اللي بتكون ضمن اطار واحد و نسقن و عدلن و ضيفن بالرئيسية مشان هالشغلة بحيث يصير الوصول أسهل لذلك ما تاكل كتير هم ..
  • صيدولةصيدولة عضو ذهبي
    تم تعديل 2011/03/05
    شكرا عالاجابة د.احمد انا بعترف اني مابفهم كتير بهالمواضيع ولاكتير بتهمني اصلا

    د.احمد ليش ماعم تعطي رأيك بالالوان .. كأنو انا الوحيدة اللي اعترضت عليها ... اذا الاغلبية موافقين فمافي داعي نعذب عمار اكتر ... صح؟!
  • AmmarAmmar عضو نشيط
    تم تعديل 2011/03/07
    عفوا للانقطاع لأسباب نهاية الاسبوع ههههههههههههه
    عموما, الألوان جاري العمل عليها, وبالفعل صايرة تشكل مشكلة بالنسبة الي, أرجو منكم اقتراح أي تشكيلة لونية من الموقع اللي عطيتكم اياه أو حتى من أي موقع آخر, يا شباب صدقوني جربت كتير, بس المشكلة أنا لونيا بعرف نفذ بس ما بعرف ابتدع :(

    صيدولة أنا معاكي كمان, الألوان لازم تتغير, لأنو بالفعل ما حلوين تكون سوداوية قاتمة !!!

    يبدو انو الموقع بالفعل يعاني من مشاكل, لأن عدد المشاركين هنا كان قليل كتير, وبالتالي الناس ما عم تحب ترد أصلا !

    في مقترح جديد: نقل العديد من المواضيع للموقع الرئيسي والعمل على بعض الربط بينه وبين الموقع الرئيسي.

    طبعا للمعلومات: بدأت العمل على العيادة الطبية الافتراضية.
  • ميرةميرة المشرفة العامة
    تم تعديل 2011/03/07
    أنا عم ادعيلك بالتوفيق عمار ..
    بيكفي ..؟؟؟
    يسلم إيديك ..بس متل ما قلتوا الألوان الفاتحة أحلى ..
    و على علمي ..
    اللون البنفسجي ..والأزرق ..والنيلي
    هي ألوان باردة وهادية ..وبتوقع تكون مريحة بالتصفح ..
    ما بعرف شو رأيكم ..جرب وشوف ..؟؟