حتى يعود المغتربون

Ph.SamaPh.Sama مشرفة منتدى تطوير الذات و NLP
تم تعديل 2011/02/03 في نشاطات و ترفيه



طلب أستاذ الصف السادس الابتدائي من تلاميذه كتابة موضوع تعبير حيث كان النص على الشكل التالي:
" لي عم مهاجر أكتب إليه رسالة أحثه فيها على العودة والتحرر من آلام الغربة, وأعلمه فيها بالتطور الذي طرأ على الوطن بعد رحيله, وزوال الأسباب التي دفعته إلى الهجرة."
نظر الطلاب إلى الأستاذ وهموا بكتابة الموضوع, لكن صوت التلميذ ديبو المتسائل أوقفهم عن عملية الكتابة.

ديبو: أستاذ شو يعني "أحثه" ؟!

الأستاذ: أحثه يعني بتقله أنو كل شي تمام والوضع عال العال يا بهيم مشان يتحمس ويرجع.
ديبو: يعني أعمل له البحر طحينة, وأرش له قنبز مشان يرجع..مو هيك أستاذ؟
الأستاذ: اخرس واكتب من تم ساكت... من وين متعلم هالحكي ولاه؟
ديبو: من المسلسلات أستاذ.
الأستاذ: لا بقى تتفرج عالتلفزيون يا دب.
ديبو: ما بقدر أستاذ..بحب المسلسلات.
الأستاذ: تفرج لكان عالمسلسلات التاريخية.
ديبو: حاضر أستاذ.
سعاد: أستاذ شو يعني تحرر؟!
الأستاذ: تحرر يعني أن نحارب العادات والتقاليد البالية.
سعاد: شو يعني عادات وتقاليد بالية أستاذ؟
الأستاذ: يعني متل ضرب الزوجات والأولاد.

فراس: أستاذ شو يعني آلام الغربة؟!
الأستاذ: يعني أنو عمك بيكون قاعد بالمهجر, وهو عم يتألم كل يوم لأنه حن الى الوطن.

سلوى: أستاذ شو يعني تطور؟!
الأستاذ: يعني متل سويسرا فرد شكل.

ليلى: أستاذ شو يعني زوال الأسباب التي دعته إلى الهجرة؟!
الأستاذ: يعني ما عاد في هم وغم ولعية قلب عالرايحة والجاية..
وكتب التلاميذ موضوعهم كما يلي:

عمي العزيز..بعد التحية والسلام,
نحثك على العودة إلى الوطن, فالوطن جميل وفي كل شارع وكل رصيف ستجد كميات من القنبز المرشوش من هنا وهناك, ولكي تصدق فقد ذهبنا في رحلة إلى رأس البسيط وشاهدنا القنبز على طول الطريق, وكان من الخطأ أن نذهب في الرحلة, لأن عمو تبع النشرة الجوية قال إن الطريق غير سالك بسبب تراكم القنبز, ولكننا لم نسمع النشرة لأننا كنا نتفرج على مسلسل باب الحارة.
المهم يا عم مالك بالطويلة وصلنا إلى رأس البسيط بعد عذاب شديد بسبب القنبز, فشاهدنا البحر وركضنا لنسبح فيه, ولكننا لم نستطع لأنه كان كله طحينة, اي عن جد تعا وشوف بعينك صار البحر طحينة.
وعندما عدنا إلى المنزل لم يضرب بابا الماما لأنه بصراحة تجوز عليها وصار يضرب مرته الجديدة, لذلك لا تهتم بالعادات والتقاليد البالية فلقد قضينا عليها.
فإذا خرجت إلى الشارع فستجد السيارات وهي تطاحش على بعضها وعلى المشاة, وستشاهد الشوارع الزفت اللي مو مزفتة بسبب الحفريات تبع التطور, والأرصفة اللي كل سنة لون, وكل شهر شكل بسبب تغيرات التطور, يعني متل سويسرا فرد شكل..بس كل يوم شكل.
كفاك آلاما في الغربة, نعرف انك تتألم عندما تقبض راتبك الكبير, وتتألم عندما تشاهد الشوارع النظيفة في الغربة, والشوفيرية الأكابر اللي ما بيهجموا عليك مشان تركض مرعوب,
نعرف أنك تتألم عندما يقول لك البقال "غود مورنينغ سير", وعندما تدفع شركتك المصاري للطبيب عوضاً عنك, وعندما تساعدك البلدية على فتح شي مشروع, وعندما يعطيك البنك قرضاً مشان تنفذ أفكارك,
نعرف أنك تعاني وتتألم في الغربة, فتعال يا عمي, لأنك إذا لم تأتي سنأخذ صفر في التعبير, بقى بيهون عليك نرسب يا عمو؟؟؟؟؟

التعليقات

  • ميرةميرة المشرفة العامة
    تم تعديل 2011/01/30
    ههههههههههههه
    موضوع واقعي تماااماً
    يسلموووووووووو سما..
    أنا من عنوانه .. فكرته من كتاباتك الأدبية..فكان فعلاً موضوع تعبييير !!!
  • suzysuzy عضو ذهبي
    تم تعديل 2011/01/30
    أما شو موضوع سما شغلة هههههههه
    بس اليوم مرقت من الكورنيش البحر لساتو مليان مي و ما فيه طحينة ابدا!
  • Dr.AhmadDr.Ahmad مدير عام
    تم تعديل 2011/01/30
    هههههههههههههههههههههههههه قنبز لكن ههههههه يسلموا دكتورة سما ... باذن الله بيرجعو لا تاكلي هم

    بتكفي معاملة وحدة بشركة الكهرباء او المي أو البلدية ليعرفوا التطور اللي صار هون هههههههههههه
  • Ph.SamaPh.Sama مشرفة منتدى تطوير الذات و NLP
    تم تعديل 2011/02/02
    شكراً ميرة و سوزي و د. أحمد ...ما فينا نقول غير اللهم أعنا على دنيانا و آخرتنا ... يعني شو بدو يحكي الواحد ليحكي ...ليش بس معاملات الكهربا و المي مشكلة دكتور أحمد ... بكرا شوف معاملات التسجيل بالنقابة و الترخيص ششششششششششغلة ... يعني شي 7000 طلعة و نزلة و شي 1000 طابع لأ و مو هون الفيلم .. الفيلم لما بتفوت ع الموظفة بتقلك بدي هالطابعين بتنزل متل الحباب و بتجيبهن من مدري وين و بعدها بتفوت ع موظفة تانية بترجع بتبعتك تجيب غير طوابع و هكذا دواليك لحتى ........ يعني خليها ع الله
  • وجيهةوجيهة مشرفة منتدى تربية الأطفال
    تم تعديل 2011/02/03
    بكل مكان العيشة صعبة مو بس بالسوريا
    ممكن لاحدا يحكي عنها لسوريا

    على قولت سوسو خيتي الشام حلوة ببساطتها
    مين قال انو يلي بالغربة مبسوط ومرتاح وماعندو مشاكل؟
  • ميرةميرة المشرفة العامة
    تم تعديل 2011/02/03
    والله معك حق وجيهة ...
    حطيتي ايدك على الجرح ...
  • Ph.SamaPh.Sama مشرفة منتدى تطوير الذات و NLP
    تم تعديل 2011/02/03
    وجيهة كتب: »
    بكل مكان العيشة صعبة مو بس بالسوريا
    ممكن لاحدا يحكي عنها لسوريا

    على قولت سوسو خيتي الشام حلوة ببساطتها
    مين قال انو يلي بالغربة مبسوط ومرتاح وماعندو مشاكل؟

    أكيد ما حدا رح يحكي ع سوريا .. البلد بلدي حتى لو جارت ... معك حق أحلى ما في بلدنا سوريا البساطة و هالشي مو بس بالشام و طبعاً ما حدا بهالدنيا مرتاح ... بس شوية تنفيس من وقت للتاني ما بيضروا مهيك ...
سجل دخولكاو سجل حسابا للتعليق.