تدخين البنات ..؟؟ موضة أم تمرد

ميرةميرة المشرفة العامة
تم تعديل 2011/01/16 في ساحة الحوار و النقاش
تدخين البنت ...موضة .. أم تمرد ..؟؟

هل تدخين البنات تمرد على العادات بين البنت والشاب ؟؟
أو إنه منافسة لأفعال الشباب والرجال ؟؟
أو أنه عادة جديدة دخيلة علينا وعلى مجتمعنا ؟؟
انتشرت في الأونه الأخير للأسف
ظاهرة تدخين البنات سرا وجهرا ..
يتساءل الأغلب عن أسباب هذه الظاهرة الغربية ...
هل تعتبر حضارة أو تحضر مثل مايظن البعض...!
او هي ظاهرة تقليد الشعور بالتمرد على القيم والعادات أو تعتبر ظاهرة لإثبات الوجود...!

ففي عصر العولمة والإنفتاح الفضائي وتقنية المعلومات
(الأنترنت )
هل أصبح تدخين البنت عادة من العادات المفروضة ،,؟!


طيب..
اذا كانت البنت ماتهتم بصحتها و تتهاون في مسألة الخطر اللي يهدد حياتها ...
معقوله تتساهل وتخاطر بأنوثتها وعذوبتها ؟



الســــــــؤال هنـــــــــا :؟؟؟؟؟
هل السبب في انتشار هذه الظاهره
الحريه من الأهل ؟
أو الثقه القويه من أولياء الأمور ؟
أو التهاون في التربيه والانشغال في أمور الدنيا ؟
أو نابع من البنت في تجربة هذه المرحلة ؟
أو ارتباط ومصاحبة البنت بصديقات السوء؟
أو مشاكل عاطفية تمر بها ؟
؟؟؟؟
بانتظار آرائكم التي أعتز بها ..

التعليقات

  • Dr.AhmadDr.Ahmad مدير عام
    تم تعديل 2011/01/13
    حقيقة بالاساس التدخين لا للشباب و لا للبنات حلو و لكن متل ما تفضلتي تدخين البنت بيضل أشد وقعا بالمجتمع لأنو بيتنافى تماما و خصوصا بأذهاننا منظر الأنوثة مع وجود السيكارة أو الأركيلة و السبب الأهم هو تهاون أولياء الأمور بالتوعية لهالناحية بالإضافة أن كثير من أولياء الأمور بيدخنوا أو بيأركلوا و هالشي بيمنعن من أنن يمنعوا الأولاد شباب أو بنات من التدخين

    .... عذرا سوزي ... انتي حالة خاصة ههههههه مع ذلك بلا أركيلة أريح الك
  • nehadnehad مشرف منتدى التغذية و الطب البديل
    تم تعديل 2011/01/13
    تدخين البنات قلة تربية
    الخخخخخخخخخخخخخخخخ
  • غاردينياغاردينيا Foreign Languages Supervisor
    تم تعديل 2011/01/13
    موضوع للأسف منتشر كتير هالأيام

    أنا رأيي تماما من رأي د.أحمد بس بأكد على موضوع التربية والبيئة المحيطة لأنو طالما كان في من البداية أساس متين ما بقا في خوف على الأولاد بالمستقبل
  • sondossondos عضو مميز
    تم تعديل 2011/01/13
    انا برأي انو التدخين بيتنافى مع انوثة البنت تماما شو ماكان السبب يلي خلى البنت تدخن او تأركل هاد الشي مابناسب
    رقة البنت حتى لو كان هل الشي مقبول بالمجتمع ... وهل الشي مو تقدمي ولاحضارة ولا له اي علاقة بالتطور بالعكس هاد تخلف انو البنت تدخن وتضر صحتها وتأذي أناقتها و أنوثتها.
  • Dr.AhmadDr.Ahmad مدير عام
    تم تعديل 2011/01/14
    nehad كتب: »
    تدخين البنات قلة تربية
    الخخخخخخخخخخخخخخخخ
    بأكد على موضوع التربية والبيئة المحيطة لأنو طالما كان في من البداية أساس متين ما بقا في خوف على الأولاد بالمستقبل

    أكيييييييييييد
  • جادجاد عضو نشيط
    تم تعديل 2011/01/14
    اذا كان رب البيت .............
    فلا عتب ,,,,,,,,,,, ان دخنوا
  • Ph.SamaPh.Sama مشرفة منتدى تطوير الذات و NLP
    تم تعديل 2011/01/14
    طبعاً التدخين عادة كتير سيئة و بالفعل مانو منيح لا للشب و لا للبنت ... بس الانتشار الكبير لهالظاهرة بالفترة الأخيرة صار متل الوباء ... يعني لما بتشوف شب بيقلك أنا ما بدخن بتستغرب كتييييييييير... لأن يمكن 85% من شباب هالأيام بيدخنوا حتى بنظري بعتبر الشب يلي ما بيدخن مجاهد .... هلأ التدخين مرفوض شرعاً و قانوناً و إنسانياً هاد الشي أكيد سواء كان المدخن بنت أو شب و ما في شي يبرر لأي إنسان إنو يسمم نفسه ... و هالحكي مو جديد لأن حتى المدخنين أنفسهم بيعرفوا ....لذلك بتصور النقاش بهيك موضوع محسوم سلفاً.... و عندي تحفظ ع عبارة تدخين البنت قلة تربية دكتور نهاد و دكتور أحمد بصراحة ما حبيتها أبداً بتصور كان لازم تصيغوها بغير طريقة.... التربية بتلعب دور بميل الإنسان نحو التدخين بس إذا عملتو نظرة ع كل شي أشخاص حواليكن من المدخنين ... رح تلاقوا أشخاص كتير تربيتهم ممتازة و ناجحين بالحياة لكنهم مدخنون ... و هاد الشي بينطبق ع الشباب و البنات... معكن إنو منظر السيكارة بإيد البنت شي ما تعودنا عليه كمجتمع شرقي و طبعاً هالمنظر يؤذي أنوثة البنت ....بتصور كناس مثقفة و واعية ما لازم نقول هالشي قلة تربية و نسكت ... المفروض كنا نناقش الأسباب يلي أدت لهالشي... يعني نجاوب ع المقطع الأخير من مقالة ميرة... و رح بلش أنا
    هل السبب في انتشار هذه الظاهره
    الحريه من الأهل ؟

    أو الثقه القويه من أولياء الأمور ؟
    إذا كان الحرية و الثقة في غير مكانها وو قتها الصحيح قد تؤدي إلى انحراف سلوك الشباب... أما الثقة و الحرية التي تعطى على أساس سليم بتصوري يستحيل علينا أن نخونها
    أو التهاون في التربيه والانشغال في أمور الدنيا ؟

    طبعاً الحرمان من الحنان و العطف الوالدي يؤدي إلى البحث عنه في أماكن أخرى و الانزلاق في كثير من المشاكل
    أو نابع من البنت في تجربة هذه المرحلة ؟
    الفضول و المغامرة عامل مهم وخطير في فئة الشباب لأن بداية أي طريق تبدأ بخطوة
    أو ارتباط ومصاحبة البنت بصديقات السوء؟
    الصاحب ساحب... متل صحيح تماماً و بتصور لا يحتاج إلى توضيح
    أو مشاكل عاطفية تمر بها ؟


    أي أزمة يمر بها أي إنسان غير مستقر عاطفياً و نفسياً قد تدفعه إلى الهروب من الواقع إلى ما ينسيه ألم الحاضر و قد يجد في التدخين ملاذاً لذلك


    تقبلوا مروري بس بدون زعل

  • صيدولةصيدولة عضو ذهبي
    تم تعديل 2011/01/15
    الســــــــؤال هنـــــــــا :؟؟؟؟؟
    هل السبب في انتشار هذه الظاهره
    الحريه من الأهل ؟
    أو الثقه القويه من أولياء الأمور ؟
    أو التهاون في التربيه والانشغال في أمور الدنيا ؟
    أو نابع من البنت في تجربة هذه المرحلة ؟
    أو ارتباط ومصاحبة البنت بصديقات السوء؟
    أو مشاكل عاطفية تمر بها

    كل هادول اسباب منطقية لتدخين البنات ...... بس اكيد الموضوع مو قلة تربية !!!!
    واكيد البنت بمجتمعنا ألها خصوصية معينة .... بس كمان التدخين غلط سواء للشب او للصبية .... ونفس الاسباب بتخلي التنين يدخنو ويدمنو عالتدخين ...
    انا ماعم دافع عن المدخنات ... لاني ضد التدخين نهائيا .... بس بعتبرو حرية شخصية بحتة
  • suzysuzy عضو ذهبي
    تم تعديل 2011/01/15
    والله حاسة انو شوي تانية رح تقيمو الحد على المدخنات و المدخنين
    أنا ما عم دافع عن التدخين أبدا بس أنا ضد ينوصف بالانحراف و تنوضعلو أسباب بتشبه أسباب الجنوح و الجريمة
    و بعتقد بمنتدى محترم من قلة التربية نرمي أحكامنا جزافا على الناس و نوصفهم بقلة التربية
    الموضوع مو مزحة و ما بيضحك أبدا نوصف أشخاص ما أساؤولنا بأوصاف ما بتليق فيهم
    ومن المعيب ان ننصب أنفسنا قيمين على سلوك الأخرين و تربيتهم (اللي بيتو من زجاج ما يرمي الناس بالحجارة)
    و ياريت يلي أكدو على موضوع التربية يعرفو لي شو معنى التربية من وجهة نظرهم
    هل من التربية أن أكون غير مدخنة و أسيء للأخرين بألفاظ غير لائقة مع العلم أنه لايوجد شخص منزه
    هل من التربية أن أكون غير مدخنة و أنصب نفسي طبيبا نفسيا يحلل سايكولوجية المدخنين و الدوافع و الأسباب
    ها من التربية أن أقيم اي شخص في المنتدى حسب ردوده الشخصية و حسب ما أراه و أنعته بصفات لا تليق به
    أنا لست ضد المبدا و لكن ضد طريقة الهجوم علينا أن نزن كلامنا قبل أن نقوله
  • Dr.AhmadDr.Ahmad مدير عام
    تم تعديل 2011/01/15
    يبدو انو الكلمة ساوت ضجة كبيرة ما كنت متصورها بصراحة لكن حابب وضح وجهة نظري بس

    لما البنت ( أو الشب ) يدخنوا أمام ولي الأمر سواء الاب او الام او حتى الاهل بشكل عام .. بنظري هالشي قلة احترام للناس الموجودين ... طبعا بأكد على ناحية انو لما يكون كل اهل البيت بيدخنوا امر طبيعي انو تدخن البنت لكن لما ما يكون حدا بالبيت بيدخن و هي الوحيدة اللي بتدخن هي أكيد قلة احترام و سامحوني فيا لكن هي وجهة نظري الشخصية بس

    و الأمر التاني اللي حابب وضحوا انو التدخين بيضل عادة منحرفة لو 100% من الناس دخنت ... و شيوع البلاء لا يجعله مسموحا أبدا ... و إلا في كتير امور تانية كان لازم ما ندقق كتير عليها و اخطر بكتير من التدخين ...

    من ناحية تالثة ... موضوع تبرير التدخين بالضغوط المحيطة و الحالة الاجتماعية يا أما موضوع مرفوض أو انو لازم نسمح للشخص اللي بيتعرض للضغوط انو يدمن مخدرات لانو التنين بنفس الحكم ... و في مقولة بالشرع بتقول """ لا تفاضل في الشر """ يعني مافي شر كتير و شر قليل ... الشر أو السوء هو سوء بحد ذاتو ... سواء كان كتير أو قليل

    كمان في احصائية بتقول و هالشي منطقي انو اكبر نسبة مدخنين هي من الاطباء و للأسف ... لكني من اول ما دخلت الكلية كل ما اسأل طبيب بيدخن بيقلي بس تكفي دراسة بتعرف ليش !!! لكني لحد الان ما عرفت ليش !! و ما بظن انو في شي يبرر التدخين

    عفوا سوزي لا أنا و لا غيري من حقو يحاسب المدخنين لكن و الله كل الكلام اللي حكيتو من انزعاجي على وضع المجتمع و حرقتي اني شوف شباب أو خليني قول أولاد عم يدخنوا و بنات عم يدخنوا و حتى الشباب مانن أحسن كمان ... و الله بينحرق قلبي على كل انسان بيدخن لكن ما بايدي ساوي شي .... و ناحية تانية أنا ما قيمت انسان حسب ردوده ... و أنا ما تكلمت عن جوانب التربية و ماني أهل أني أتكلم عن التربية
    بس عفوا حابب اعرف شو مقصدك من :
    اللي بيتو من زجاج ما يرمي الناس بالحجارة

    صيدولة : التدخين حرية شخصية بحتة صح لكن ما لما أجي و دخن بالباص او الميكرو و ضايق كل الناس بريحة الدخان و مالما دخن بمكان مغلق مع العلم انو في كتير ناس بيتضايقوا من ريحة السيكارة !!؟؟ هالشي كمان حرية شخصية ؟؟؟

    بالنهاية انا بعتذر للكل إذا كلامي كان قاسي لكن متل ما قلت ما صدر مني هالكلام غير من حرقتي أني شوف ناس عم تاخد السم بيدها ... بكرر اعتذاري
  • ميرةميرة المشرفة العامة
    تم تعديل 2011/01/15

    آسفة كتير على الصورة الي وصل فيها النقاش ...!!!!
    بنظري التدخين ببدايته ممكن يكون تجريب شي جديد ..
    كنوع من الرجولة وإثبات الذات..للشباب
    وللبنات كنوع من الموضةالدارجة الي ممكن تتغير شكلها ومفاهيمها بكل وقت
    بعدين بيصير نوع من الادمان الجسدي والتعلق النفسي
    للشباب والبنات ..
    وأكيد نسبة كبيرة من الأطباء أو العاملين بالمجال الصحي بيدخنوا للأسف ؟..
    مع معرفتهم الأكيدة لنواحي أضراره الجسيمة
    بس بيكونوا للأسف الشديد وصلوا لمرحلة من الادمان
    ..من الصعب جداً ..وليس المستحيل ..الشفاء منها
    ما بنقدر نوصف المدخنين ..شباب ولا بنات بقلة التربية أبداً ..
    وصراحة نسبة المنحرفين المدخنين نسبة قليلة
    بس بنلاقي التدخين بأغلب فئات المجتمع ..
    أنا بشوف انها ابتلاء ومعصية يجب الاستتار منها
    وما نجاهر فيها كما أمرنا حبيبنا المصطفى عليه أفضل الصلاة وأتم السلام
    إذا بُليتم بالمعاصي فاستتروا
    أنا ما بقول بالنسبة الشب عادي ..بس هو شي تعودنا عليه ..وبتمنى الشفاء العاجل من ادمانه
    أما البنات ..بشوفه شي غريب وملفت للنظر ومجاهرة بالمعصية..
    الي كان حياء البنت وخجلها بيمنعها من مزاولتها

  • nehadnehad مشرف منتدى التغذية و الطب البديل
    تم تعديل 2011/01/15
    الله يسامحكم هلأ نحنا غلط
    والمدخنة على صح ---أنا لن أدخل معك بسجال ولكن عليك أن تلاحظ المدخنات وتناقشيهم ببعض الأفكار ثم أعطيني النتيجة
    على فكرة ربما تعرفي مدخنات معرفة سطحية ويكونو ناجحين في نظرك ولكن اقتربي منهم أكثر واحتكي بهم ثم قيمي الأمر ---معك سنة من الآن
  • ميرةميرة المشرفة العامة
    تم تعديل 2011/01/15
    أنا ما بعرف بمحيطي أي مدخنة ..
    بس بعرف مدخنين كتير وعلى خلق رفيع ..بس للأسف أدمنوا التدخين
    وحاولوا تركه لكن للأسف بيجي رفيق سوء ..وبيقول له ..؟؟؟
    سيجارة وحدة ما بتأثر ...
  • nehadnehad مشرف منتدى التغذية و الطب البديل
    تم تعديل 2011/01/15
    وهل رفيق السوء على خلق !!!!!!!!!!!!!!!!!!!!!!!!!!
  • Ph.SamaPh.Sama مشرفة منتدى تطوير الذات و NLP
    تم تعديل 2011/01/15
    كأن هالموضوع وصل لنقطة ما لازم يوصلها... بالبداية رح ارجع أكد ع قصة إنو التدخين عادة غير مستحبة و غير مقبولة لكلا الجنسين ...و ما في شي بيبرر إلقاء الأنفس إلى التهلكة... هي النقطة كلنا متفقين عليها... هلأ دكتور أحمد يلي قصدتو بحكيك مفهوم و أنا بحيي فيك هالإحساس ع المجتمع بس أنا كان تعقيبي إنو كلمة قلة تربية إلها دلالات كتيرة سيئة و يلي طلبتو إنو كان لازم تنصاغ بطريقة تانية... التربية بتلعب دور هام بالإدمان ع أي شي بس الدراسات أثبتت إنو أصدقاء السوء بيتحملو فوق 60% من أسباب الإدمان ...و بالنسبة للدكتور نهاد أنا بدي إسألك سؤال هل يا ترى السطحية للإناث فقط ؟ يعني شيل شغلة التدخين ع جنب ؟معقول مانك شايف و لا شب سطحي؟ بصراحة ما بتصور؟و ع فكرة الإنسان السطحي ما ممكن يكون ناجح إلا بنظر أمثالو و هاد الشي ما إلو علاقة بكونه ذكر أو أنثى؟ يعني الشغلة ما بدها سنة بالنسبة إلي لأن الإنسان السطحي مع سيكارة أو بدونها هاد هوي...
    و في شغلة سوزي اهدي شوي مو مستاهلة القصة كل هالعصبية ... عباراتك كانت قوية كتير ... و بعض جملك إجت بمطرحها الصحيح بس يمكن زعلتي الشباب هون!!!!!!!!!!

  • ميرةميرة المشرفة العامة
    تم تعديل 2011/01/15
    أكيد لااااا
    رفيق سوء.. هون تعبير مجازي إذا بدك...
    لأنه بدل ما ينهاه عن السوء ويشجعه على تركه ..؟؟
    شجعه عليه
  • nehadnehad مشرف منتدى التغذية و الطب البديل
    تم تعديل 2011/01/15
    في مثل بالشام بيقول : قالو بتعرفه قاله نعم قاله عاشرته قاله لا قالو ماعرفتو
    يا سما لاتكشفي الناس الا بالعشرة وهذه تتطلب وقت لاتتسرعي
  • Ph.SamaPh.Sama مشرفة منتدى تطوير الذات و NLP
    تم تعديل 2011/01/15
    شغلة إنو المعاشرة بتخليك تعرف الشخص أكتر مزبوطة بس قصدي إنو السطحية ما إلها علاقة بجنس الشخص و لا بكونه مدخن أو غير مدخن... و بعدين شغلة اكتشاف سطحية أي إنسان ما بدها معرفة طويلة كتير ...و بالمناسبة يلي قلتو مو جواب ع سؤالي؟؟؟؟
  • nehadnehad مشرف منتدى التغذية و الطب البديل
    تم تعديل 2011/01/15
    للأسف ولكي لاأتهم بالظلم 25%من الشباب من كلا الجنسين سطحيين
  • Ph.SamaPh.Sama مشرفة منتدى تطوير الذات و NLP
    تم تعديل 2011/01/16
    nehad كتب: »
    للأسف ولكي لاأتهم بالظلم 25%من الشباب من كلا الجنسين سطحيين

    شكراً دكتور نهاد و أكيد ما حدا رح يتهمك بالظلم ... بس يلي حابة أكدو و لو إنو هالشي طلع عن نطاق النقاش إنو السطحية موجودة ... و ما إلها علاقة بالتدخين... و طبعاً ما فيك تقول كل المدخنات سطحيات لأن في بنات ما بيدخنوا و سطحيات و كمان بتلاقي شباب سطحيين و ممكن يكونوا مدخنيين أو لأ...و لما حكيت إنو بتلاقي أشخاص مدخنيين و ناجحين بالحياة فأنا ما حددت الجنس و أكيد هالشي جاي من معاشرة هالأشخاص لفترة بس متل ما قال د. أحمد نحنا منزعل ع هيك أشخاص و منستغرب لجوئهم إلى التدخين و أكيد لحد الآن ما فهمنا ليش وصلوا للإدمان على التدخين
  • nehadnehad مشرف منتدى التغذية و الطب البديل
    تم تعديل 2011/01/16
    لم أصف المدخنات بالسطحية فلا تقول على لساني بل قلت رأي وهو مكتوب في أول صفحة وكل ما قيل سوف يتغير مع الزمن

    وعلى كل حال كل واحد حر برأيه وأعتذر من المدخنات في المنتدى
  • Ph.SamaPh.Sama مشرفة منتدى تطوير الذات و NLP
    تم تعديل 2011/01/16
    nehad كتب: »
    ولكن عليك أن تلاحظ المدخنات وتناقشيهم ببعض الأفكار ثم أعطيني النتيجة
    على فكرة ربما تعرفي مدخنات معرفة سطحية ويكونو ناجحين في نظرك ولكن اقتربي منهم أكثر واحتكي بهم ثم قيمي الأمر -
    --
    تعليقي كان على هذه العبارة و بعتذر إذا انفهم كلامي بصيغة تانية و لو أنو بتصور إنو مفهوم تماماً متل بقية الآراء الموجودة للجميع... و طبعاً كل واحد عطى رأيو الشخصي بهالموضوع و هالآراء كلها نابعة من تجاربنا بالحياة يعني يمكن تتغير و يمكن تترسخ أكتر ...بالنهاية بتمنى الموضوع يمر بسلام و ما حدا يضايق من حدا ....
  • nehadnehad مشرف منتدى التغذية و الطب البديل
    تم تعديل 2011/01/16
    ألا تعلمي معنى أن تعرفي شخص معرفة سطحية

    معناها أن معرفتك عنها قليلة وليس أن تكون هي سطحية
  • Ph.SamaPh.Sama مشرفة منتدى تطوير الذات و NLP
    تم تعديل 2011/01/16
    أكيد بعرف الفرق بين المعرفة السطحية و السطحية نفسها... و أي شخص لما بتعاشرو أكتر بتفهموا أحسن ...أكيد طلعت ع الموضوع بسؤالي عن السطحية بس هاد يلي فهمتوا من عبارة (عليك أن تلاحظ المدخنات وتناقشيهم ببعض الأفكار ثم أعطيني النتيجة)...و عطيت رأيي ما أكتر
  • صيدولةصيدولة عضو ذهبي
    تم تعديل 2011/01/16
    طولو بالكن ياجماعة .... الموضوع طلع كتير عن مسارو ... وماحدا عم يقدر يوصل فكرتو بالطريقة الصحيحة...

    المهم كلياتنا متفقين انو التدخين عادة صحية خاطئة في مجتمعنا ولازم نحاول نحد منها ... وهون الفكرة الاساسية
  • دمعة فرحدمعة فرح عضو مميز
    تم تعديل 2011/01/16
    فعلا صيدولة انا معك الموضوع صار مزعج وسواء اتفقنا او اختلفنا هالظاهرة موجودة وهيك نقاش ما حيبدلها او يحسن الوضع لذلك برأيي نسكر الموضوع احسن للكل
  • nehadnehad مشرف منتدى التغذية و الطب البديل
    تم تعديل 2011/01/16
    بالطبع خلافنا هذا بسبب وجود جيلين وربما ثلاثة في المنتدى والخلاف في الآراء لايفسد للود قضية فهنا نحن في المنتدى أخوة ونكمل بعضنا بعض فاذا اختلفنا حول مفهوم أو فكرة لايعني هذا أن نأخذ مواقف متشنجة بالعكس فهذا الخلاف طبيعي وعلامة صحية وأطمئن الجميع أنه لنيكون أي تبعات لهذا النقاش لأنه مجرد خلاف في الرأي وانتهينا وأشكر جميع من اهتم وشارك وأدلى برأيه ونشكر صاحبة الموضوع ميرة --ونتمنى أن تستمر بطرح مواضع حيوية مثل تلك
  • Dr.AhmadDr.Ahmad مدير عام
    تم تعديل 2011/01/16
    والخلاف في الآراء لايفسد للود قضية فهنا نحن في المنتدى أخوة
    هاد الكلام هو الكلام الصحيح ... و بالنهاية كل انسان الو حريتو بالتفكير و حريتو بتصنيف الناس و ما حدا بيلزم التاني برأيو ... و خلينا عند فكرة صيدولة
    المهم كلياتنا متفقين انو التدخين عادة صحية خاطئة في مجتمعنا ولازم نحاول نحد منها ... وهون الفكرة الاساسية
    يا ريت لو يكون هاد آخر رد بالموضوع ...

    بعتذر عن نفسي أولا و عن الجميع لكل من شعر بسوء تجاهه من النقاش في هذا الموضوع لكنه مجرد نقاش و من الطبيعي كما قال حكيم نهاد ان نختلف فيه لأننا لسنا نسخ من البشر و إنما لكل منا تفكيره و استقلاليته

    و أنا بأيد نقطة حكيم نهاد
    ونتمنى أن تستمر بطرح مواضع حيوية مثل تلك

    بالنهاية شكرا ميرة و صيدولة و سوزي و د.سما و دمعة فرح و أكيد حكيم نهاد لأرائكم و للنقاش اللي كان - برغم حديتو ^^ احيانا - كان ان شاء الله مفيد ...

    قبل ما أختم ... ان شاء الله رح نزل دراسة اجريناها بالكلية السنة الماضية ضمن مادة الطب الوقائي كانت بعنوان " دراسة إحصائية حول انتشار التدخين بين الشباب الجامعيين في جامعة البعث في الكليات غير الطبية " و كانت باشراف دكتور المادة و شملت عينة حوالي 666 طالب من كليات مختلفة و للأسف الشديد كان مجموع ما ينفقه طلاب جامعة البعث فقط من اموال على التدخين يقدر يوميا ب 2150000 ليرة سورية فقط لا غير !!!!!!!

    و السلام عليكم و رحمة الله و بركاته
  • nehadnehad مشرف منتدى التغذية و الطب البديل
    تم تعديل 2011/01/16
    لك الشكر د0 أحمد