أهمية تدريس الطب والعلوم الصحية باللغة العربية

razok

العربية هي إحدى اللغات الرسمية الست في الأمم المتحدة، أفلا تكون العربية لغة الجامعات العربية.
رؤية المنظمات الدولية التي تدعو لتدريس الطب باللغة العربية:
رؤية اليونسكو ومنظمة الصحة العالمية:
أوصت باستعمال اللغة الأُم في التعليم وإذا علمنا أن الطب يدرس بـ (44 لغة) في العالم، بعد أن أيقن خبراؤها أن الطالب الذي يتلقى علومه بلغة غير لغته الأُم سوف يُصاغ فكره وثقافته من خلال اللغة الغربية التي يتعلم بها.
ولهذا فقد أنشأت المنظمة مكتب تنسيق التعريب في الرباط (توحيد المصطلحات)، والمركز العربي للتعريب والترجمة والتأليف والنشر بدمشق (ترجمة وتعريب) ليقوما بهذه المهمة، وإن منظمة الصحة العالمية تدعو لجعل لغة تعليم الطب وسائر العلوم الصحية في الكليات والمعاهد في الإقليم بالغة الوطنية.
ما رأيكم بالموضوع

dr.Hazem

هاد الصح يا اخي....

صيدولة

فكرة مهمة كتير ...
وأكيد هاد هو الصح ... واللغة الام هي الاساس ... بس هاد ما بيلغي اهمية اللغة الانكليزية خاصة بهالمجالات الطبية والعلمية .... لان هي لغة العلم... واللي بدو يبقى على اطلاع بالمستجدات لازم يتكون لغته الاجنبية جيدة ... بس كمان من ناحية تانية والله في مصطلحات علمية تعريبها عم يكون كتير غليظ ...!!!
تذكرت شغلة انحكت ئدامي من فترة .... عن الامتحان الوطني اللي قدموه طلاب الجامعات السورية السنة الماضية واللي كان باللغة العربية وهالشي كان صعب كتير على طلاب الجامعات الخاصة لان مناهجهن بالانكليزي .... !!!!

حكيم

الكلام بها الموضوع كتير حساس
انا بالبداية كنت كتير مبسوط لأني عم أدرس بالعربي وكنت أفتخر بهالشي قدام الطلاب من جامعات تانية بس الحقيقة أني حاليا أواجه الأمرين في الاطلاع على أخر المجلات الطبية الأجنبية حتى على مستوى المنتديات الطبية العربية يلي بتحكي المصطلحات الطبية الانكليزية بأحرف عربية وبتداولها ببساطة كأنها جزء من اللغة بينما بضل ساعة لفك الكلمة
أنا مع تعريب ومع أنو تصير لغتنا لغة علمية بس اكيد بغير الطريقة يلي بجامعاتنا
حاليا الطبيب السوري أمهر طبيب اسنان على مستوى الوطن العربي لكن على مستوى العالم نظرا لابتعاده عن المجتمع الطبي العالمي فهو بعيد عن كتير عن التفاعل والانتاج
لساني مع تطوير لغتنا العربية ودمجها بكل العلوم لكن لازم يكون في راوفد جيدة للغة الانكليزية نظرا لأنها اللغة العالمية وصعب نوقف بوجه هالحقيقة

Dr.Ahmad

شكرا razok على طرح الفكرة

رأيي من رأي صيدولة و حكيم ...

دراسة الطب بالعربي ضروري جدا جدا بس في ناحية ذكرتها صيدولة و هي انو ترجمة بعض المصطلحات بيكون اصعب من الكلمة الانكليزية نفسا ( متل كلمة ازفاء ... شوفو اديه غريبة ... هي ترجمة لكلمة Translocation و متلها متايل ) ... هي الكلمات الغريبة هي بسبب تعدد اللهجات يعني بمصر في مفردات عربية غريبة عنا في سوريا كذلك الامر في الخليج و كمان نفس القصة بالمغرب العربي .... يعني كل منطقة الها مفرادات ما منسمعها بغير مكان و هالشي هو سبب وجود ترجمات اصعب من الكلمة الاصلية نفسا

متل ما ذكر انو تدريس الطب بالعربي بيزيد من امكانية التواصل مع المرضى اللي هو أهم نقطة بالطب اساسا ... من مقاييس الطبيب الناجح انو يقدر يتواصل مع المريض بلغة يفهما المريض !! و هي ما ممكن تتصورا اديش صعبة .... يعني على مستوى سوريا بس كل منطقة و كل محافظة في تسميات غريبة عجيبة للأمراض ...!!! ((( بحلب بيقولو للشخص للطفل اللي عم يتقيأ ... عم " يهت " !!!!!!!!!!!!!!!!!!!!؟؟؟؟ حدا ممكن يخطر ببالو هالشي !!! )))

بنفس الوقت انو الطالب تكونو انكليزيتو ممتازة هاد امر اكتر من مهم لانو للأسف مافي مرجع عليه القيمة بالعربي !!! كلن انكليزي او معظمن انكليزي او مترجم للانكليزي ... الحمد لله انا من ناحيتي قدرت طور الانكليزي لحالي لكن بيضل في نقص كبير !!!

د.وسيم

التعليم باللغات المحلية جيد للطبيب والمريض
يسمح بالتقارب المفيد بينهما
لكن البعد ونقص النصيحة من المدرسين سببت بعدنا عن اللغة لفترات طويلة
لا توجد لدينا مراكز بحثية ولا تأليف علمي لذلك لا داعي ان نكون متعصبين جداً
لا اريد المدح بالتعليم الأجنباوي لكنه الحل لمآسينا مع الخارج

Dr.Ahmad

د.وسيم كتب: »

لا توجد لدينا مراكز بحثية ولا تأليف علمي لذلك لا داعي ان نكون متعصبين جداً
لا اريد المدح بالتعليم الأجنباوي لكنه الحل لمآسينا مع الخارج

صح, تماما تماما

دمعة فرح

البحوث العلمية الحديثة غربية ولو كانت على ايدي عربية
يعني نحنا قبل ما نفكر بتعريب التدريس لازم نفكر بنهضة علمية عربية حديثة بدل ما نعيش على امجاد الماضي
ووقتها ممكن هنن يتعلمو العربي مع انو حلم هههههههههههههههههه