اختصاصك هو خيارك ام لا؟؟

لحن الحياة

مساء الخير لكل الاعضاء الاعزاء ...
عندي سؤال صغير بتمنى اعرف اجاباتكم بخصوصه..
متل ما لاحظت انو منتدانا فيه تنوع بالاختصاصات والمجالات من طب وصيدلة وعلوم ولغة ...
سؤالي هو :
هل اختصاصك كان خيارك وكان هدفك وحلمك من زمان؟؟
اذا ما كان هيك شو هيي الاسباب يلي خلتك تكون بهالمجال؟؟
واخر شي لو هلأ عندك حرية كاملة وظروف مثالية حتى تختار المجال يلي بتحس حالك فيه ,شو كنت بتختار؟؟
بتمنى تفاعلكم

Dr.Ahmad

يسلموا لحن الحياة ... عنوان الموضوع حلو و جوابي عليه انو اختصاصي ما كان اختياري ... و إن كان الي رغبة فيه لكن ما كانت الرغبة رقم واحد ...

لو كان الخيار الي كنت اخترت هندسة الكترونيات و اتصالات .... من انا و صغير بحلم بجد اني كون مخترع ... لكن سبحان الله مالي نصيب اني ادرس هالفرع

و الطب كان رغبة الأهل التي لا مجال للنقاش فيها أبدا ....*_*

najou

شكرا امل ... سؤال يتكرر كثير عندنا بالمسابقات الشفويه....
دراسة ال English كان إختياري بكل قناعة و حب... فمن أحب أبدع...

صيدولة

سؤال حلو كتير لحن الحياة ... بس ما جاوبتي انتي عليه بالأول .... !%[لأ
انا عني الكل بيعرف انو الصيدلة اختياري رغم انو كان مو رغبة اهلي ابدا :cool2:... بس انا اللي أصريت عليه ... وكان حلمي من ايام الثانوي اني ادرس صيدلة ( مع انو بل كنت فكر بالمعلوماتية:whistling::whistling: .... ) وليكني الحمدلله رغم كل الصعوبات مابندم ابدا وان شاءالله كم شهر وبتخرج

حكيم

اختصاصي هو خياري العقلاني أكتر منه خياري اللي كنت بحلم فيه
كان في مليون سبب لفوت طب بالنسبة لأهلي بس ما في ولا سبب أنو فوت غير شي غير أنو ميولي كانت باتجاه الرسم والادب والفنون
يعني كان البديل فنون جميله أو باحسن الأحوال هندسة معمارية وطبعا كل ما سبق تم رفضه عن طريق غسيل دماغ ممنهج مورس علي مذ دخلت المدرسة وتفوقت . وعندما حصلت درجة الطب أصبح الأمر منتهيا ببساطة لم أستطع الرفض
الآن لست نادما وممتن جدا لوالدي ربما لم يكن خياري الاول لكن لا ريب أنه الأفضل ولو أعاد الزمن كرته لما كنت إلا طبيب أسنان
قد تثيرني أحيانا اللوحات الفنية المعلقة وأسأل نفسي أكان يجب أن أكون هنا
والحمد لله ياتيني الجواب صارخا من أعماقي :لا أبدا سواء كان أهلي يخططون منذ البداية لكي اكون طبيبا أولا فأنا سعيد جدا بما أنا عليه

لحن الحياة

شكرا كتير لمروركم جميعا...والحمد لله انو الكل مبسوط و رضيان باختصاصه و عنجد حلو التاقلم الواضح عند الكل...
بالنسبة الي الصيدلة ما كانت حلمي بس من وانا صغيرة وماما دايما بتحط براسي فكرة انو انا بالمستقبل رح كون صيدلانية فصرت مهيأة نفسيا للموضوع ولما كانت نتيجة البكلوريا بتسمحلي بهيدا الفرع سجلت صيدلة وهيك صار...
هلأ بالنسبة انا شو بحب صراحة في اكتر من شغلة بس اكتر شي بحبو اني كون مخرجة تلفزيون ,سينما , مسرح ..اي شي ..ولما بشوف مسلسل مو بس بهتم بالاحداث وشو عم بصير ,بهتم اكتر كيف المشهد عم يتصور ,كيف اللقطة عم تتاخد ,تفاصيل الشخصيات ...كأنو حكيت كتير!!!
المهم كمان من الشغلات يلي بحبها انو كون لاعبة تنس ..
هلأ كمان شغلة بحبها كتير كتيييييييييييير هي كرة القدم !!!و لو اني كنت صبي مو بنت اكيد كنت هلأ لاعب كرة قدم !!!!
يعني باختصار ميولي فنية رياضية...
المهم هلأ اني الحمد لله مو ندمانة وفعلا متل ما قال الاخ حكيم اختصاصي هو خياري العقلاني...

وجيهة

موضوع كتير حلو ..يسلمووو
والردود كتير مهضومة..
اختصاصي هو اختياري وحدي..
هو وانا وصغيرة كنت كتير شريرة ع الصغار هههههه والكل بيقول يلي بدو يعذب ابنو يعطي ل وجيهة....
بس لما اكبرت شوي اتحولت من شريرة لحنونة كتير ع الصغار وبفرح كتير بشوفتهم...الله لايحرمنا منهم ...

دمعة فرح

عجبني الموضوع
وعجبتني فكرة غسيل الدماغ اللي مورس عالبعض
انا كمان هيك اختصاصي بالبيولوجيا ما كان اختياري الشخصي مع حبي للعلوم بس يمكن كنت بحب كون صحفية او كاتبة اكتر
طبعا قوبل هالموضوع بالرفض هالشي سببلي ازمة بالبداية كسرت علاماتي كرمال ما ادخل صيدلة او طب متل ما كان مخطط مع العلم اني كنت متفوقة بس الجنان
اول سنة اتعذبت كتير بس هلق كتير مبسوطة ومرتاحة نفسيا وطاير عقلي بالعلوم

ميرة

مشكورة لحن الحياة على إثارة هالموضوع المهم بحياتنا كلنا
أنا كنت ولا زلت بحب كل شي فيه فن ..
بالرسم أو الكتابة
بس الصيدلة كانت أبعد شي عن بالي
الأسنان كانت تعجبني كتير وتشدني
بس بحياتي ما تخيلت نفسي طبيبة أسنان ..؟؟؟؟
صراحة مجموعي هو الي أهلني لهذا الفرع
مع شوية تفكير عقلانييييييييييي دخلته ..
أما باقي اهتماماتي ..بمارسها كهوايات مو أكتر

لحن الحياة

ميرة ,دمعة فرح , وجيهة ...بشكر مشاركتم جميعا ...
وعنجد كتير حلو انو كل المشاركات يلي شفناها مبين فيها انو الكل قدر يتكيف مع اختصاصه وحتى انو يحبه ....حتى لو ما كان حلمه او هدفه بالاول...
بتمنى للكل التوفيق والنجاح ...

noone

اختصاصي ما كان اختياري متل ما بيقولوا ( رماني البحر على شط الصيدلة )
أنا كان بدي طب وكان حلمي الوحيد بس المعدل فرق معي
بعد أول سنة صيدلة حاولت أطلب تحويل بس كمان ما صح لي
وبعد هيك قلت يا زلمة مشي حالك وبالاخر ماحدا رضيان بتخصصه ,
لحد ما جربت مواد الكلينكال فحبيتها وحسيت انه هاد الي بدي اياه
وبالاخير الصيدلة ما كنت اختياري بس هي الوحيدة يلي فتحت لي ابوابه لهيك بحس بالولاء لإلها

بالمناسبة أغلب طلاب التخصصات الطبية الهن ميول فنية متل الرسم والأدب وغيره كتير عم شوف هيك


وشكرا

غاردينيا

سؤال مميز لحن الحياة مشكورة
بالنسبة إلي دراسة الأدب الإنكليزي هو مو بس خياري أنا كمان أصريت عليه بالرغم من انو أمي كانت معارضة وخاصة أنو مجموعي كان بأهلني
أختار اللي بدي بس بصراحة كتير تفاجأت من الطرق المتبعة بتدريس اللغات عنا بالجامعة وأحبططت كتير أول فترة بس بعدين تأقلمت واعتمدت على جهدي الشخصي لطور حالي
لأنو بالحقيقة الجامعة مابتعلم أبدا للأسف !!!!!!

روراي

من وانا بالمرحلة الابتدائية وانا بحب الرياضيات
ولصرت بالمرحلة البكلوريا وانا بحب مادة الرياضيات وبتمنى كون انسة رياضيات
بس مجموع البكلوريا ماسمحلي ادرس هاد الاختصاص ...

وبعدين كلو نصحني انو سجل انجلش لان لغة العصر واني بقدر كون انسة
وبعدين الله وفقني واخدت بنصيحة الناس الطيبة وتخرجة ترجمة ..

بس ماصار شي هلا بدرس رياضيات كمان

nawal

واااااااااااو سؤالك في الصميم اصبتي به شي مدفون بداخلي
لم يكن اختصاصي هو هدفي ولت حتى حلمي بس الظروف اجبرتني ان اتخذه بحياتي.انا كنت احب الطب وكنت انوي الدخول بهذا المجال بس قدر الله وما شاء فعل.
وان لم تعمل ما تحب فاحب ما تعمل

Dr.Ahmad

وان لم تعمل ما تحب فاحب ما تعمل

صحيح تماما و الخير دائما فيما اختاره الله