معتقدات شامية

TAMMAM

معتقدات شاميه








* اذا انكسرت كاسة بيقولوا: انكسر الشر (تقولوا الشر مخلوق من الزجاج)



* اذا مر حدا فوق الطفل ما بقا يطول ( انو اذا طفل صغير متسطّح ما بصير حدا يمر من فوقوا ليشششش لان ما بعود بيطول الولد بيطلع قصير؟؟!!! و متل ما بقول المتل فشخة حية ولا فشخة بنية)




* قص الاظافر بالليل مو منيح (لا تسألو ليش ما بعرف ولا حدا بيعرف بس مو منيح و خلص )



* مراششة الميه فراق (ما بصير حدا يرش رفيقو بالمي لان بعدين بيتفرقوا اي شو عم يرشه بالزيت كاز )




* للي بيفوت على بيت جديد بيفوت معه عرق اخضر و مقص و مصحف و يدخل بالرجل اليمين (واللي بيعمل غير هيك بيتحول لسعدان !!)



* اذا اجت الكندرة فوق الكندرة يعني رايحين مشوار (واذا اجت تحتها يعني راجعين من المشوار ؟؟!!)


* اذا زحف الولد او زقزقت العصافير معناها جاينا ضيوف (وبهيك حالة لازم توقفوا ورى الباب لانهم بكونوا طالعين عالدرج)



*اذا طنت ادنك اليمين حدا عم يحكي عنا بالمنيح و اذا طنت اليسار معناها حدا عم يجيب سيرتنا بالعاطل (واذا طنوا مع بعض معناتها طرشت عليك العوض)



* اذا كان في خناقة بيقولوا اقلبوا الصرامي لتحمى الخناقة (شماتة ) الله لا يشمت حدا فينا






* اذا رفت عيني اليمين بيكون جاينا خبر طريف


*اذا رفت عيني الشمال بيكون جاينا خبر مو منيح(اما اذا رفوا سوى فأنت اكيد احول)




* اذا حكني حاجبي معناها بدنا نستقبل حدا جاي من السفر






*إذا حكني كفي اليمين معناها بدي أقبض مصاري




*و إذا حكني كفي اليسار معناها بدي أدفع مصاري (اما اذا حكك شي تاني بقى فأنت اكيد جربان روح تحمم)



* و ما بصير الحمام بالليل (طبعا شي بديهي لأن اكيد المي بتكون مقطوعة)



*و ما بينفع كب المي بالبلوعة بالليل من غير التسمية بالله و الاستعاذة أولا (يالطيف مشان ما يأذونا ولا نأذيهن) بس عرفتوا مين هدول؟؟؟؟؟؟؟؟؟؟؟؟؟؟........... ولا انا !!!!




*واذا شفت مقص مفتوح لازم فورا تسكرو ( لانو المقص الفاتح تمو بيعمل خناق )




*وإذا عمل العصفور تحتو على الأواعي يعني جاييكون رزقة (وما لازم تغسل ملابسك شي سنة مشان الرزقة)



*و دلق القهوة رزقة وكمان نفس الحكي خليها مدلوقة لا تمسحها



*و شرب المي بعد القهوة قلة زوء (حتى لو اتشردقت موت ولا تشرب مي )




*و اذا الولد الصغير كتير ابن الشهور عم يضحك لحالو بيقولو الملايكة بتكون عم تحاكيه بس ابصر شو ؟؟؟!!!






* و كمان في اعتقاد انو اذا البنت اول ما خلقت وطوطوها ( يعني دهنوها بدم وطواط ) ما بيعود بيطلعلها شعر بجسمها أبداً (عرفتوا ليش بعض البنات عندهم شعر كتير )






* كمان يلي حامل بصبي بتتباشع واذا حامل ببنت بتحلا



* وإذا الطفل قعد بالصينية وهي عالأرض بيرتعبوا لأنه هاد الولد رح يضيع (ويمكن يتشرد هاد اذا ما طلع حرامي كمان )




* و كمان إذا حدا صبلك شاي او قهوة وملى الفنجان كتير بكون قلبوه مليان منك واذا صبها ناقصة هدا دليل على انو هالشخص ناقص



*واذا عندك ضيف اتقيل دم وبدك يروح من عندك على السريع شك دبووس او عدة دبابيس بأيد المقشة او اقرأ سورة الزلزلة (بس اكيد في عالم اذا بتقرأ القرأن كله بيضلوا لزقة فلا تحاول)




*واذا خايف من عين اتصيبك جيب ورقة واكتب عليها اسم الشخص الي خايف من عينو وغزها بالدبوس وانت عم تقراء المعوذات وتقول من عين افلان و تنفخ... وفي حل تاني انك تروح تشيل عيونه وبلا وجعة هالراس




*والي بيعدّ النجوم بيطلعلو تالولات بايدو (بس اذا حسن يحصيهم ما بيطلع شي)




*وبعد ما نخلص صلاة نطوي السجادة مشان الشيطان ما يصلي عليها (خلّيه يصلّي بركدن يتوب ويصير يوسوسلنا بالخير!!)

براعم

استنا حتى افضالك هلق عندي امتحانات رح قلك عى تفسير كل واحدة يا معدل......................*

TAMMAM

ولي ليش؟؟؟؟؟؟؟؟؟ شو في ؟؟؟؟؟؟؟؟؟؟؟ شو صاير لا تواخذوني فايق من النوم من شوي ؟؟؟؟؟؟؟؟؟ في طوشة ؟؟؟؟؟؟ لقوم روح عل البيت تعبان كتير

nehad

شو قصتك مع الشوام

Dr.Ahmad

يسلموا تمام

بس على فكرة تمام هي المعتقدات موجودة و ما حدا بينكرها و لكن رجاااااء يا اخوان هي فيها شرك أصغر بالله تعالى و انتبهو منيح تبتعدوا عنهاااا

صيدولة

معك حق د. احمد
بس هي منتشرة كتير وبكل محل .. مو بس بالشام ( بس تمام حصرها هونيك .... يمكن لغايات تانية )
وعنجد لازم ننتبه منها منيح

دكتوربالفطرة

إن بعض القول فن .. فاجعل الإصغاء فناً

تفنن قد ما بدك ع الشوام تمام ونحنا لح نفنلك شي فنة يا بتصير بعدها شامي يا منصير نحنا حموية
هههههههههه قال وطوطوها بس فرجيني حالك بالنهار خخخخخخخخخخخع دير بالك

Dr.Ahmad

باين في بوادر حرب حموية شامية ....... طولو بالكن و لا تضحكوا الحماصنة علينا ههههههههههههه

كوثر كيوان

كثير حلو تعليقك تمام على المعتقدات الشامية عنجد خفيف دم
بااااااي..........

dr.Ali

لحظة شوي
بدي قلكون انو هالأقوال مو بس بالشام بيقولوها بكل المحافظات
و أنا مع أحمد و صيدولة لازم ننتبه
بس عجبني رد دكتور بالفطرة .... يا أخي قوي...

TAMMAM

أخ يا لطيف يا ساتر يارب

شباب أنا من شوي فقت من النوم مين كان عم يصرخ وقلقلي راحتي

يلي بدو يلعب يروح يلعب بعيد .......... يالله بدي ارجع نام

دكتوربالفطرة

تمام ليش تنام صرنا بالليل وهلأ وقتك حبيبي لا تخاف مافي صيادي خفافيش (غيري هههههههه )بعدين هي معتقدات
وللا بلشت تؤمن فيها خخخخخخخع

TAMMAM

أيوااااااااا قلتكم روحوا لعبوا بعيد : آآآآآآآآآآآآآآآآآآآآآآه

دكتوربالفطرة

احلى تمام نحنا نهز الورد بس لنشم ريحتو ....

TAMMAM

خخخخخخخخخخخخخخخخخخخخخ قدصك أنا اللي عم هز الورد مو هيك

أحلى دكتور بالفطرة وع فكرة

وجيهة

هههههههههه
للأسف المعتقدات مزبوط موجودة
بس متل ما قال الدكتور احمد فيها نوع الشرك ...لان فيها تشائم

لقول الرسول صلى الله عليه وسلم ( ( الطيرة شرك، الطيرة شرك، الطيرة شرك ))

وفي رواية ( من ردته الطيرة عن حاجة فقد أشرك ) .

بسام

شكرا الك اخ تمام طرحت الموضوع بشسكل ممتاز.
وزكرتنا بامور كانت غايبة عنا شوية .
بس راح نبقى نعتقد فيها.

Dr.Ahmad

حكيم بسام هو الغاية دائما التذكير " و ذكر فإن الذكرى تنفع المؤمنين "

وجيهة كلامك صحيح تماما هي معتقدات صح بس يفترض فينا نحن الجيل الواعي ان شاء الله انو نوجه الناس لترك هالامور

sondos

هههههههههههههه كتير حلوين على فكرة انا شامية ومابعرفهن كلن طبعا ما بأمن ولا بشي منهن...يسلمو تمام وكل يلي علق عجبني تعليقو بشكر الجميع .