صورة ونقاش ..

[Dr.Ahmad]

بداية كل شي بكتبه هو رأي شخصي فقط ... و ممكن الانسان يغير رأيه لو شاف شي غلط عندو

اهلا فيك أخي حكيم ... بداية انا تكلمت عن الناحية الدينية لأنها أوردت ناحية الغنى و اللي ذكرت بتعليق سابق أنو بهالوقت الحالي عم يصير من الصعب انو عمل الرجل لوحده يأمن متطلبات الحياة كاملة ( من الناحية المادية ) لهيك أنا رديت من وجهة نظر دينية لقول أنو : لأ هالكلام ما صحيح و رب العالمين ما بينسى حدا ... و المبررات هي بشكل أساسي انو يكون في وقت فراغ أو خليني قول وقت زائد عند المرأة بعد تلبية حاجات المنزل .. أو تكون مضطرة مادية و هي ناحية طويلة كتير و بالنهاية و بكل الاحوال العمل لازم يكون ضمن الحدود اللي هي بشكل أساسي : ضمن حدود الأدب و الحشمة و هي أهم نقطة و ثم ضمن حدود الوقت الفراغ بحيث ما ياخد من وقت البيت .. هاد أهم شي برأيي

دكتورة سوزي .. اللي تفضلتي فيه من ناحية انو المرأة المتعلمة أقدر على تربية أولادها أنا معك تماما فيه و ما بعارضك أبدا و هاد شي بديهي لكن هاد شي ما بيمنع أنو تعلق شهادتها جوا البيت و تعلم أولادا لأنو تربية الاولاد تحتاج لمتابعة دائمة ما بس ساعة أو ساعتين ... و لا أنا غلطان ...

على فكرة ... تفكير البنت انو العمل اساسي و هي ما درست لتقعد بالبيت منتشر بين البنات اللي بيدرسوا فروع طبية بشكل اساسي أما باقي البنات نادرا ما يذكروا هي النقطة !!! ليش ؟؟ بسبب السنة أو السنتين دراسة زيادة يا ترى أو لأنو هي الفروع مقدرة اجتماعيا أكتر ؟؟؟ يا ريت يكون في جواب مقنع ...


دكتورة سوزي في عبارة بتتردد كتير بين البنات هي " تقدر تحقق ذاتها " بس ما سمعت و لا تفسير واضح لهالعبارة و كل اللي بيقولوها ما بيقدروا يوضحوا معناها ... يا ريت تقليلي شو المقصود منها ؟ و شو هي العوامل اللي بتخلي المرأة تحقق ذاتها ؟؟

[د.مفدى زهور عدي]

الأخوة والأخوات الأكارم:
عمل المرأة بمهن شريفة وهامة للمجتمع ليس فيه مانع شرعي ولا غضاضة إن توفرت الشروط المناسبة كعدم خلو الرجل بالمرأة والمحافظة على لباس الحشمة وطريقة التعامل مع الآخرين ضمن الأصول والعرف والدين دون تبرج ولا لين في القول ولا تغنج اوتدلل ومياعة وشطط....بل عمل جاد يحفظ فيه شرف الزوج وقدسية الحياة الزوجية وبفترة زمنية لا تؤثر على غيابها عن منزلها وعن حاجة أسرتها لها..ويجب تجنب الإخلال بالعلاقة الزوجية..أما دخل الزوجة فهو لها كلياً وهي حرة في التصرف به سواء لبيتها أم لمشاريع أخرى, وطبعاً هي لن تمانع في نفقات البيت والمساهمة مع دخل الزوج بطواعية...

قد تمر مراحل زمنية وتغيرات على العلاقة بين الزوجين بتغير الظروف وقد يفقد الزوج للزوجة والأبناء للأم وتحصل معاناة هامة قد ينجم عنها مشاكل زوجية خطرة...وهنا يجب الأخذ بالحكمة والتفكير بالمصلحة الأسرية فوق كل اعتبار مادي..

بعض المهن للمراة مريحة وسهلة وهامة للمجتمع ولا تتعارض مع وظيفتها الأساسية الغريزية كأم والتي حباها الله به وشرفها بها...هي مدرسة ومربية وزوجة حنونة وليس غير ذلك...هنا يجب الحكمة ولا قاعدة صارمة تنطبق على الجميع منهن...

الاخت سوزي صيدلانية مرموقة وتعمل ساعات طوال خارج منزلها...وتنطبق عليها الشروط من حيث الحشمة وماذكرته آنفاً, كما أنها ست بيت من الدرجة الأولى وزوجة ناجحة ومربية ممتازة...وهي مثال جيد يحتذى به...أشكرك أخت سوزي على ماذكرت بحقنا من ثناء إذ قلت:

من تجربتي وبأكد انو تفرغ الأم مو قاعدة لنجاح الأولاد أو نجاح الأسرة و المنزل و عمل الأم كمان مو قاعدة لفشل الأسرة
المهم هوي تنظيم الوقت و تحديد المسؤوليات صحيح بتتعب زيادة بس بتربي أولادها على النظام و تحمل المسؤولية
و أكبر مثال عائلة الدكتور مفدى عائلة رائعة بكل معنى الكلمة الأب طبيب و الأم طبيبة بدوام كامل في بلد عربي بعيدا عن مساعدة الأهل
و مع ذلك أسسو أسرة ما شاء الله مثالية بيت نظيف راقي مريح و أولاد غاية في التهذيب و الخلق و بمستوى تعليمي عالي


وللجميع كامل محبتي وتقديري وأتمنى من الصيدلانية ميرة أن تعمل وتمارس علمها الصيدلاني في السعودية,, فهي مثال آخر على الزوجة الرائعة المتعلمة..

[suzy]

بشكرك دكتور مفدى على الثناء خجلتني
يا جماعة يلي بيقرا بيفكرنا عم نجامل بعض بس عن جد الحقيقة انو بمحيطنا أنا و الدكتور مفدى باعتبار نحنا قرايبين كتير أمثلة عن نساء عاملات مو بس بمجال الطب(والدة الدكتورة عزة يلي انضمت من فترة للعيادة أكاديمية وصلت لمركز مرموق في وزارة التربية و التعليم)و أسسو أسر تعتبر مثال يحتذى بكافة المجالات الحياتية زز
برأيي الحل متل ما قال الدكتور حكيم بالضبط هوي التعاون بين الأم و الأب في تسيير شؤون الأسرة سواء في أمور البيت أو تربية الأولاد و متابعة أمور دراستهم
دكتور أحمد ما بس الدارسات بالحقل الطبي بيطمحو للعمل كل فتاة واعية و عندها طموح أكيد هدفها بعد نهاية تحصيلها الدراسي هوي العمل
بالنسبة لتحقيق الذات العمل برأيي يكفي الانسان ماديا و يبعده عن البطالة و الفراغ و ينميه علميا و عمليا و اجتماعيا و يعزز وجوده كفرد فاعل ضمن مجتمعه
و يساعده على الارتقاء بنفسه و بمجتمعه و مساعدة غيره

[حكيم]

د مفدى وسوزي شكرا لأنكن الصورة المثالية اللي كنت عم احكي عنها
أنا سألت عن النظرة الدينية لشغل المرأة لوضح أنو في كتير رجال بيحرموا نسائهم من العمل وبحبسوهم بالبيت بحجة التدين فقط مع أنو حتى على زمان سيدنا النبي عليه الصلاة والسلام كان في نساء يشتغلوا متل السيدة رفيدة الأنصارية اللي كانت طبيبة مثلا بقى المشكلة مو بالشغل المشكلة بس بنوع الشغل وكونه متوافر فيه الشروط اللي انذكرت ولا لأ وهون فينا نطرح سؤال تاني يا ترى يا دكتور أحمد بحقلنا انا وانت نمنع نسائنا من العمل إذا كان محقق الشروط ولا هادا حق وشي شخصي متل ما قلت؟؟
وشغلة تانيه انا بتوقع أنو عمل المرأة أحيانا ممكن يكون فرض متل إذا كانت طبيبة نسائية بقرية ريفية فمعقول هون تترك الناس يموتوا كرمى لعيون جوزها الأفندي ؟
وعلى فكرة ما لها علاقة كونن طبيبات( مع أنو هي رحمة لحتى ما تضطر نسائنا يلجؤوا لدكتور ذكر متخصص نسائية او جلدية......... أو حتى سنان ) أي امرأة محبة لأسرتها وقادرة توفق وتفيد المجتمع بشغلها بكون كتر خيرها
كلمة أخيرة اخي أحمد( اللـــــــه يحمل معها ويصبرها صاحبة النصيب)

[ميرة]

مشكورين على الحوار اللطيف ..وإبداء وجهات النظر المختلفة ..
علم المرأة هو سلاح يجب أن تحصل عليه ..وتستعمله متى احتاجت إليه ..
وبأكد على ضرورة إكمال المرأة دراستها وثقافتها ..
لأن هالشي بينعكس على حياتها الأسرية الاجتماعية ..
قبل الزواج ما بتوقع وجود أي مشكلة في العمل..بالعكس ممكن العمل يصقل شخصية البنت ويوسع آفاق تفكيرها ..وتتعرف على الناس أكتر وتدرس طباعهم ..وهالشي كله خبرة ممكن تستفيد منها مستقبلاً
بس بوجود أطفال بأعمار صغيرة ..؟؟؟؟؟؟
بتصور من الاجرام ترك طفل عمره عشرين يوم أو شهر .. مهما كان السبب
هلئ العامل الاقتصادي إله دور كبير بعمل المرأة ..وممكن بمساعدة من الأهل ما يكون في أي صعوبة ..
بالنسبة إلي كان عملي بأخر قائمة أولوياتي لما سافرت ..
والحمد لله ما ندمت لأني تركته ..مع اني درست وتعبت متل ما قلتوا
لأني لو اشتغلت لازم يكون في بديل لوجودي بالبيت ..وهي الشغالة ..؟؟؟
وهاد الشي الي عم حاول ما يصير لهلئ ..مع حاجتي الشديده إلها ..

[Dr.Ahmad]

كلمة أخيرة اخي أحمد( اللـــــــه يحمل معها ويصبرها صاحبة النصيب)

ههههههههههههههههههه ... الله يسامحك ...

رح قلك أخي حكيم .. بالنسبة لي لن أتزوج إلا من متعلمة جامعية إن شاء الله و لن أحرمها من العمل لو أرادت و لست متعصب للعمل خارج المنزل و المرأة هي فقط المسؤولة لا أبدا أنا أؤمن بأن دور الرجل في البيت لا ينقص أبدا عن دور المرأة .... لكن النقطة الوحيدة اللي بالي دائما عندا هي نفس النقطة اللي تكلمت عنها الاخت ميرة ( انا بأيد رأيها تماما بكل كلمة قالتها ) و هي مجربة لهالناحية و عايشتها مباشرة ... طفل عمرو أشهر او سنة !!! وقت العمل مين رح يبقى معو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ يا ريت يكون في جواب لساوي حلف مناصرة عمل المراة ههههههههههههه ... يا ريت ما يكون الجواب شغالة أو بيبي سيتر ... لاني أرفض تمام الرفض و مستعد انا اترك الشغل و اقعد بالبيت و لا انو أولادي تربين امرأة غريبة !!

هي العبارة بردك أخت ميرة تساوي ذهبا و أكتر كمان

بس بوجود أطفال بأعمار صغيرة ..؟؟؟؟؟؟ .......... بتصور من الاجرام ترك طفل عمره عشرين يوم أو شهر .. مهما كان السبب

دكتورة سوزي أنا بعرف كتير حالات من غير المجال الطبي و متل ما تفضلتي الامر متعلق بالبنت فقط و ليس بدراستها

حابب قلك شغلة أخي حكيم .. انت تكلمت عن الشروط الدينية و انا رح قلك شرط ما ذكرتو حضرتك و هو انو يكون عمل المرأة لا يتسبب بعطالة رجل و ممكن لو ما متأكد من كلامي تراجع الكتب الدينية أو العلماء و بهاد الشرط فعمل نسبة هائلة جدا تفوق النصف من النساء غير جائز ... انا ما تكلمت عن هاد الشرط بداية مشان يصير الحوار ديني ...

[noone]

صباح \ مساء الخير

هلأ اسمحوا لي أغير الموجه





شو السر أو الحكمة في كتابة الوصفة بهالطريقة ؟

[noone]

[حكيم]

حلو ابو حميد كلامك فيه روح وانا متفق معك من الأول (جزئيا) عندي اقتراحات واجوبة كتيرة بس nooneالله يصلحو غير الموجه والحديث يطول (فيك تناقشو مع المدام مستقبلا هههههه)

nooneباينتك معاني من هالقصة ^-^ شو ما عطوكن بالجامعة مادة (خط الأطباء بين الطلاسم والتفسير) !!!!!كان بودي فيد جماعة الصيادلة بس الخط هو جزء من سر المهنة ههههههههه

[noone]

حلو ابو حميد كلامك فيه روح وانا متفق معك من الأول (جزئيا) عندي اقتراحات واجوبة كتيرة بس nooneالله يصلحو غير الموجه والحديث يطول (فيك تناقشو مع المدام مستقبلا هههههه)

باينته الموضوع كان حامي , للصراحة أنا ما قرأته ,,

nooneباينتك معاني من هالقصة ^-^ شو ما عطوكن بالجامعة مادة (خط الأطباء بين الطلاسم والتفسير) !!!!!كان بودي فيد جماعة الصيادلة بس الخط هو جزء من سر المهنة ههههههههه

و ليش ماهن بعطوكن دروس خصوصية تحسنوا الخط نحنا مو ناقصين مواد , هههههه
هلأ عم فكر لاقي تفسير لهالموضوع , بس صدمتني أنا مفكر أطباء العيادة عنا غير شكل ,



هههههههه