مناقشات فموية

[dr.Ali]

سلام عليكم جميعاً
جميع أعضاء العيادة السورية أدعوكم إلى اقامة نقاش متجدد يدور حول عادات فموية نقوم بها و علاقتها بالأمراض السنية و تأثيراتها و سنبدأ بعادة هامة هي استخدام الخيط السني (flossing)
فهل نتذكر هذه العادة و نقوم بها؟؟؟؟؟؟؟؟؟؟؟؟؟؟؟؟؟

[ميرة]

ألف شكر د .علي على فتح المناقشة السنية ..
وأكيد في مواضيع كتييير بنتمنى نعرف عنها أكتر وأكتر ..

بالنسبة للخيط السني ..
أنا بعترف بتقصير باستخدامه ^_*
مع علمي بضرورته !!..وأكيد بسبب تراص الأسنان يعني بصعوووبة كبيرة ممكن أدخله بين سنين ..
هذا إذا ما انقطع ...ههههه

[حكيم]

وعليكم السلام د. علي
الخيط السني وسيلة من وسائل دعم التفريش السني وعلى الرغم من إنه غير شائع عنا إلا إنو شائع جدا بالبلدان المتقدمة وفي كتير من الدراسات بتقول إنو أهميته تكاد توازي الفرشاة , لكن للأسف الصورة اللي عند معظم الناس عنه إنو شي صعب وبياخد وقت ومقرف وبيعمل مشاكل باللثة والاسنان وهادا الشي خلاه يتراجع ويترك الساحة للفرشاية. ولحتى وضح الصورة رح قلكن شو هي الاستفسارات اللي بتجيني عن الخيط السني وكيف بجاوب عليها بالعادة.
1- هل الخيط السني مهم ويا ترى الفرشاية ما بتغني عنه؟
الجواب إذاكنت 1- بتراعي قواعد التفريش من حيث المدة (5 دقايق) ومن حيث التكرار (3 مرات عالأقل) ومن حيث الشمولية (كل السطوح لكل سن بكل فك) 2- أسنانك صفة وحدة وما فيهن تراكب ولا انفتال. 3- بتفرشي بعد الوجبات الرئيسية وما بتاكل وجبات خفيفة بيناتن 4- ما عندك نخور ولا انكسارات ولا أمراض لثة 5- بتراجع الطبيب بشكل مستمر ودوري كل 6 أشهر فخدها مني ما في داعي إلها أما غير هيك وهو الغالب فهي رح تساعدك كتير بتقليل نسبة النخور والشعور بفم نظيف .
2- صحيح إنو في طريقة خاصة لاستخدام الخيط السني؟
تماما الطريقة الصحيحة لاستخدام الخيط إنك تقطع خيط طوله حوالي 8-9 سم وبعدين تلفه على قاعدة الاصبع الوسطى من كل طرف على كل إيد وتحاول تستخدم الابهام من إيد والسبابة من الإيد التانية لتتحكم فيه (وإذا بدك تطلع من كل هالتعقيد فيك تجيب خيوط بحوامل بلاستيكية) بعدين بتحاول تدخله بالمسافة بين السنية بحركات عمودية لفوق وتحت من دون تطبيق قوة كبيرة اتأكد إنو سطح السن صار أملس وما في بقايا وطبعا بتطبق هالشي بين كل الاسنان بالترتيب سن سن.
3- طيب الشغلة ما بتاخد وقت؟
طبعا أول مرة بتاخد شي نص ساعة بس بالتدريب بتصير تاخد 5 دقايق.
4- طيب إذا عامل تقويم أو أسناني متراكبة ومتلاصقة كتير كيف بدي أستخدمه؟
إذا كنت عامل تقويم أو سنانك متراكبة فإنت أكتر من غيرك بحاجة لاستخدام الوسائل الداعمة للتفريش العادي ومنها الخيط السني حاول تستخدمه قد ما بتقدر وحسب ما بتسمح حالتك .
5- يقال إنو الخيوط بتعمل مشاكل باللثة والاسنان؟
تماما الاستخدام الخاطئ بيعمل مشاكل كتيرة منها 1- استخدام قوة كبيرة وبشكل مبالغ فيه بؤدي لسحل السطوح الملاصقة 2- تحريك الخيط حول السن حركة أفقية بدل العمودية اللي حكينا عنها بيعمل خطوط سحل عالأعناق بتعمل لاحقا نخور وحساسية وبتسيء للمظهر الطبيعي للسن3- إدخال الخيط بشكل كبير باتجاه اللثة يؤدي لرض الحليمة اللثوية بين السنية وتراجعها 4- عدم الانتباه لنظافة الخيوط يؤدي لاندخال جراثيم وفطريات بمناطق حساسة مما يؤدي لحدوث التهابات
بالنهاية الخيط السني وسيلة مهمة ومهمته ليست تكميلية وحسب وهو الوسيلة الثانية الأكثر شيوعا بعد الفرشاة ومع التطور اللي طرأ عليه من حيث نوعية الخيوط وتزويدها بالحوامل صار يوم بعد يوم أسهل وأكثر تداولا أما المشاكل اللي ارتبطت فيه ظلما فهي حقيقة ارتبطت باسخدامه الخاطئ وليس فيه نفسه يعني متل أي شي بالحياة.
على فكرة فيه سؤال أخير دائما بيسألوني ياه بعد كل هالشرح وما بعرف كيف بدي جاوب عليه فحتى ما تروادكن نفسكن تسألوه متل كل مرضاي رح قلكن ياه
6- طيب دكتور إنت بتستخدمه؟!!!!!!